Баян-Өлгей аймағындағы ағайындарға гуманитарлық көмекті жеткізуге аттанған топ елге оралды. Естеріңізге сала, шілденің 10 күні Моңғолия Республикасында тұратын қандастарымыздың өлкесін су басып, 1500 адам баспанасыз қалды. Қандастарымыз табиғат апатынан зардап шеккен осындай ұрымтал тұста Оңтүстік Қазақстан облысының әкімдігі әлеуметтік көмек ретінде азық-түлік тиелген жүк көлігін Баян-Өлгейге аттандырды. Ал, «Айғақ» қоғамдық телеарнасының басшысы бастаған топ ақпараттық қолдау танытып, жүк көлігімен бірге табиғат апатынан зардап шеккен аймақта болып, алыстағы ағайынның қайғысына ортақтасып, қолдан келген көмекті беріп қайтты. Шілде айының 27-сі күні Оңтүстіктен азық-түлік тиелген жүк көлігі жолға аттанды. Гуманитарлық көмекпен бірге «Айғақ» телеарнасының басшысы Дулат Әбіш бастаған топ та жеңіл көлікпен Моңғолия Республикасына жол тартты. Қазақстанның бірнеше облысын басып өтіп, Ресейдегі Алтай тауларын жағалап Моңғолиядағы Баян-Өлгейге де келіп жеттік. Шымкенттен – Баян-Өлгейге дейін тура 4000 шақырым жол жүрілді. Табиғи апат болған аймаққа келгенде 105 мың халықтың 95 пайызы қазақтар екенін білдік. Жәйбарақат жатқан сол қандастарымызды табиғи апат бір сәтте әбігерге салып кетіпті… Мына көрініс -үстіміздегі жылдың 10-11 шілдесі күнгі жағдай. Түрғындардың баспаналар қирап, дүниелері су үстінде қалғып жатыр. Белден асатын су әбіржітіп жатқанда, жергілікті жұрт тек жанның амандығын тілепті.
Жылағанды жұбатып, қайғыны бөлісетін ел емеспіз бе? Тұтқиылдап келген апаттан аман қалып, қиналған қандастарымызға Оңтүстік Қазақстан облысынан көмекші топ алғашқылардың бірі болып жетті. Олар ең әуелі су тасқынының астында қалып, қаза тапқан бүлдіршіннің ата-анасына көңіл айтуды жөн санады. Облыстық мәслихаттың депутаты Дулат Әбіш бастап, Бәйдібек ауданының Құрметті азаматы Абзал Әділбеков және өзге де азаматтар қайғыға ортақтасты. 3 жасар Ақтілек Бейсенұлының рухына арнап құран бағышталып, отбасына қаржылай көмек берілді. Осы тұста 1991 жылға сәл шегініс жасасақ. Шығыс Қазақстан облысының Зайсан ауданында болған зілзала кезіндеде 3 жасар Біржан есімді бүлдіршін де қаза тапқан болатын. Сол кезде қыршын кеткен баланың отбасына Ел Президенті Нұрсұлтан Назарбаев арнайы барып, көңіл айтты. Міне Елбасының сол көрегенділігін Оңтүстік Қазақстаннан барған көмекші топ жалғап отыр.
76 жастағы Ками Жусанбайқызы су тасқыны кезінде денсаулықтан айырылған. Онсыз да әл-ауқаты төмен қарт кісінің бүгінгі күйі тым аянышты. Тіршілігін көрсеңіз, жүрегіңіз ауырғанымен, қайсарлығына таңырқайсыз. Қарие ата-жұртынан жағдайын сұрай келгендерге дән риза болып, бір марқайып қалды.
Сынған домбыраны қолға ұстап тұрған Олжас есімді баланың суреті әлеуметтік желіге тарап кеткен болатын. Кейін оған елдегі белсенді азаматтың бірі Берік Уәли жаңа домбыраны сыйға тартты. Міне, сол отбасына халық қалаулысы да барып Отырар ауданының әкімі Ерлан Айтаханов аманат еткен сыйлықты табыс етті.
Сондай-ақ Баян-Өлгейде жүрген Оңтүстікқазақстандықтар Алланың ақ үйінде аялдады. Ондағы мақсат- Ордабасы ауданының әкімі Алмасбек Мамытбековтың ең үлкен сыйы — Құран кітапты тарту ету болатын. Осылайша «Сәлем» мешітіне елдің сәлемі жетті. Яғни, Моңғолия Ислам Діндарлар Муфтиятының төрағасы Азатхан қажы Мұханұлы бұл сыйды аса жоғары мәртебемен қабыл алды.
Қандастарға алыстан ат терлетіп, демеу болып келген азаматтарды аймақтың әкімі Ғылымхан Айыпұлы қабылдап, ризашылығын білдірді. Мемлекет басшысы Н.Назарбаев жүктеген «Бір мақсат, бір мүдде, бір болашақ» деген қағиданы шет жұрттағыларда сезінгендей.
Сондай-ақ, оңтүстікқазақстандық көмекші топты қабылдаған Баян-Өлгей аймағы Құрылтайының төрағасы Бауыржан Дәлелұлына «Бал Текстильдің» кілемін тарту жасады. 
Айтпақшы, ең бір әсерлі сый Баян-Өлгей аймақтық мұражайына берілді. Моңғолия қазақтары туралы деректер сақталған мұражайға киелі Отырардың тіршілігі бейнеленген картина табысталды. Яғни, бұл суреттен бір кездері ұлы Шыңғысхан қиратып, басып алмақ болған бұрынғы Отырар қаласының гүлденген келбетін көруге болады. Мұның өзі үлкен бір тарих.
Жеңіл көлікпен жеткен топтың соңынан іле-шала азық-түлік тиелген жүк көлігі де келді. Патриоттық сөздер жазылып, қажетті заттар тиелген көлік табиғи апаттан зардап шеккен көшелермен жүріп өтіп, түрғындарды да рухани жағынан қолдады. Мақсат- Дүниежүзіндегі қазақтардың қамқоршысы – Тәуелсіз Қазақстан екенін білдірту еді.
Ия, «Дүние суға кетсе де, иманымыздан айырылып қалмайық» деп отырған қандастарымыздың төзімділігіне риза болдық. Тұрағы бөлек болғанымен, қазақ деп соққан жүрегі бар баянөлгейліктердің бүгінгі қуанышын көргенде, бір серпіліп қалдық. Иә, қазақ қашан да ағайын үшін қолындағы барын беріп, бөліскен қазақстандық бауыпларына деген ықыласында шек жоқ. Табиғат апатынан зардап шеккен бауырларымыз киім-кешексіз, азық-түлік, баспанасыз қалып, киіз үйлерді паналап отыр. Шет жұрттағы қазақтарға гуманитарлық көмек ретінде келген жүк көлігіндегі азық-түлік мемлекеттік қоймаға жеткізілді. Дәл сол жерде қамқорлықты қажет етіп отырған отбасылар арнайы шақыртылып, азық-түлік тарқатылып берілді. Тізім бойынша 1500-дей азамат баспанасыз қалған болса, оларға қажетті деген Отандық өнімдер-заттар мен азық-түліктер үлестірілді.
Сондай-ақ, Оңтүстіктен әкелінген тиісті қаражатқа құрылысқа қажет ағаш сатып алынып, қоймаларға қойылды. Баспанаға зәру отбасыларға бұл ағаштар жаңа салынар үйдің бір бұрышы болмақ. Осылайша өңірімізден аттанған гуманитарлық көмек діттеген орынға жетіп, алыстағы қандастарды азда болса бір марқайтты. Сөйтіп, қандастарымызға тілеулес жұрты мен Отаны бар екенін сездіртті. Қашан да жақсылықты ескеретін баянөлгейліктер ОҚО әкімі Бейбіт Атамқұловқа алғыс хат жазып, жеткізуді облыстық мәслихатттың депутаты Дулат Әбішке аманат етіп тапсырды.
«Әр қазақ- менің жалғызым» — деген аталы сөз бар. Гуманитарлық көмектің түпкі мақсаты- қандастарымыз әлемнің қай елінде жүрсе де, бауырмал халқы барын білдіру. Елбасы «Қазақстан жолы — 2050: бір мақсат, бір мүдде, бір болашақ» деп құрған маңызды жоспары бір жағадан бас, бір жеңнен қол шығаруға шақырады. Сондықтан қандай жағдай болмасын руға, жүзге, атаға бөлінбей, қазақ болып қалғанға не жетсін?! Бірлік- елдің берекесі. Қандас бауырларымыз қайда жүрсе де аман-есен болсын деген ниетпен Баян-Өлгей аймағынан алыстап, Қазақстанға бет алдық. Моңғолия елінде қалған қандастар қимастықпен қол бұлғап қала берді. Хош, баянөлгейлік қандастар, енді ешқашан табиғат зардабы орын алмасын, бас аман, бауыр бүтін болсын!
Бағлан Байкөбекқызы,
Шымкент — Баян-Өлгей (Моңғолия) — Шымкент
