ОҚО әкімі Баян-Өлгейге жолға шыққан делегацияны қабылдады

Сәрсенбіде ОҚО әкімі Бейбіт Атамқұлов Монғолияның Баян-Өлгей аймағына жолға шыққалы жатқан қоғамдық делегацияны қабылдады. Облыс мәслихатының депутаты, ОҚО Қоғамдық Кеңесінің мүшесі, ҚР Президенті жанындағы БАҚ жөніндегі Кеңес мүшесі Дулат Әбіш бастаған топ құрамында «Бізбен бірге» қоғамдық қорының президенті Абай Андабаев, «Шаян» газетінің бас редакторы, журналист-мұрағатшы Абзал Әділбеков, Әл-Фараби ауданының имамы Әділбай Тойшиев, телеарна редакторы Бағлан Байкөбекқызы, журналист Гүлжан Келдебекова, телеоператорлар Ақжол Рахманқұлов, Айдар Есқұловтар бар.Осы орайда облыс басшысы Бейбіт Бәкірұлы  игілігі мол қайырымды істің басы қасында жүрген азаматтарды қабылдап, ақ жол тіледі. Өзгеге жылулық пен қуаныш сыйлап, жомарттық танытып, түбі бір қазақ баласы үшін алыс сапарға шығатын азаматтарға облыс халқының атынан алғыс айтып, ақжол тіледі. Қиналғанға демеу бола білетін халық қалаулысы өңірдегі жаны жомарт азаматтардың жолдаған сәлемдемесінде жеткізуді жөн көріп, аманатын орындауды мақсат тұтқан. Яғни, Баян-Өлгейдегі баспанасынан айырылып, демеу іздеген қандастарымызға барып, материалдық және рухани көмек беріп, азаматтық парызын орындауға ниетті. Сонымен қатар, көрші өлкедегі селден жапа шеккен азаматтар үшін Оңтүстік Қазақстан облысының атынан қаржы жинап, азық — түлік тиелген жүк көлігі күні кеше Монғолияға аттанған болатын. Енді өңір халқының сәлемін жолдап, жолға шыққан Дулат Әбіш бастаған топпен бірге арнаның түсірілім тобы да барып, ақпараттық қолдау көрсететін болады. Естеріңізге сала кетейік, 10-шы шілде күні қазақтар шоғырланған аймақты сел басып, 700-дей отбасы баспанасыз қалған болатын.
Жолға шығып бара жатқан бұл топтың қоржынында негізінен, облыстағы аудандардан жиналған рухани дүниелер – кітаптар мен сурет картиналары сынды өнер бұйымдары, сондай-ақ, Оңтүстіктен шыққан отандық өнімдер де бар. Шілде айының соңғы күндері Монғолияда кездесетін өңір белсенділері көрші елдегі қандастарымызға материалдық жағынан ғана емес, рухани да қолдау көрсететін болады. Айта кетейік, «Айғақ» телеарнасы Оңтүстік жұртшылығына танымдық, рухани-мәдени бағдарламаларды дайындауды жоспарлап отыр.