Қала әкімдігінің кезекті мәжілісінде кәмелетке толмағандар арасында құқық бұзушылық пен қылмыстың алдын алу туралы әңгіме болды. Қала әкімі Ғабидолла Әбдірахымовтың төрағалығымен өткен жиында жасөспірімдер арасындағы қылмыс, аутодеструктивті мінез-құлықтың алдын алу (суицид) және мектеп жасындағы ерте жүктіліктің алдын алу мәселелері бойынша қалалық білім бөлімінің басшысы Жанат Тәжиева баяндама жасады. Алқалы жиында мектеп оқушылары арасындағы қылмыстың туындауына түрлі интернет желісіне кіретін смартфондар себеп болып отырғандығы айтылып, ата-аналар комитеті арқылы бұл іске тосқауыл қою жағы талқыға салынды.
Білім бөлімі мен құқық қорғау органдары бірлесіп жұмыс істеуінің арқасында қаламызда жасөспірімдер арасындағы қылмысты азайту жұмыстары оң нәтиже беріп келеді. Бұл туралы қаланың бас ұстазы айтып өтті. Мәселен, 2016-2017 оқу жылына арналған кешенді іс-шара жоспары бойынша кәмелетке толмаған оқушыларға және олардың заңды өкілдеріне құқықтық кеңес беру жадынамасы жасалып, үздік мектептердің тәжірибесін жинақтап, мектеп психологтарына, сынып жетекшілеріне, ата-аналарға және оқушыларға арналған әдістемелік нұсқаулықтар дайындалған.
-«Ата-аналармен білім мекемелері арасындағы пікірлесуді дамыту үшін білім бөлімі жанынан «WhatsАpp» / 8 771 828 58 85 / қызметі ашылып, келіп түскен ақпараттар негізінде жүйелі жұмыстар жүргізіліп келеді», — дейді Жанат Арысбекқызы.
Қаланың бас ұстазы өскелең ұрпақ үшін отбасындағы тәрбиеден тыс өзін қоршаған ортадағы тәрбиенің де маңызы зор екендігін айта келе, ағымдағы жылдың 25-ші тамызынан бастап қала аумағындағы халық көп шоғырланатын орындарға, көше бойларына бейне роликтер мен баннерлерді орналастыру үшін ішкі саясат бөліміне ұсыныс енгізілгендігін жеткізді. Сонымен қатар, білім бөлімінің басшысы ішкі істер басқармасы, қалаға қарасты аудан әкімдіктері, жолаушылар көлігі және автомобиль жолдары бөлімі, ішкі саяса бөлімі, денсаулық сақтау басқармасы, үкіметтік емес ұйымдар бірлесіп ұрпақ тәрбиесіне баса назар аударуға шақырды.
Шымкент қаласы әкімінің баспасөз қызметі
