Арыстың ахуалы ел Үкіметінің жіті бақылауында

Үкімет басшысы А.Мамин Арыс қаласын қалпына келтіру жұмыстарының барысымен танысты.

ҚР Премьер-министрі Асқар Мамин бүгін түс ауа Арыс қаласына кезекті мəрте жұмыс сапарымен келді. Мұнда Үкімет басшысы апаттан зардап шеккен қаланы қайта қалпына келтіру бағытында əрбір облыс пен аудандарға жүктелген секторлардағы құрылыс барысымен танысты.
Бүгінде Арыс қаласын қайта қалпына келтіру шаралары қарқынды түрде жүргізілуде. Айталық, қаладағы ауқымды сектордың біріне жауапты ретінде Маңғыстау облысы мен Сайрам ауданы бекітілген. Бұл секторда жалпы саны 331 тұрғын үй болса, соның 279-на жөндеу жұмыстары жүргізілетін болады. Оның ішінде 4 үй бұзылып, қайта салынатын нысандар қатарында. Қазір тиісті жұмыстарды межелі мерзімде аяқтау үшін құрылыс барысы қарқын алған. Бұл тұрғыда жөндеу жұмыстары үшін жауапты штаб атынан 7 бірдей құрылыс компаниясы мен 310 жұмысшы еңбек етуде.

Нəтижесінде бұл аумақта бүгінге дейін 102 баспана жөндеуден өтіп үлгерсе, 147 үйде құрылыс жұмыстары жүргізілуде. Маңғыстау облысы мен Сайрам ауданына тиесілі аумақтағы істерге қанық болған Асқар Мамин мұнда жергілікті тұрғындармен кездесті. Өз кезегінде арыстық ағайын қиын сəтте қолдау білдірген барша қауымға шынайы алғыстарын білдірді.
Ал мұнан соң Премьер-министр Қостанай облысы мен Сарыағаш аудандарына бекітілген сектордың да жұмысымен арнайы танысты. Мұнда Үкімет басшысы апат кезінде баспанасы жарамсыз күйге түскен жергілікті тұрғын Рүстембек Қалмахановтың шаңырағында болып бұл отбасы үшін жаңадан салынып жатқан құрылыспен танысты. Бұл жанұяның да ел үкіметіне айтар алғысы мол.

«Айғақ-Ақпарат»