Арыстықтар өз үйлеріне жол тартты!

Дүйсенбіде Арыс қаласында орын алған апат кезінде Шымкент қаласына жайғастырылған Арыс қаласының тұрғындары бүгін өз шаңырақтарына қайтуда. Қазіргі таңда апат орын алған қаланы тазарту жұмыстары аяқталып, тұрғындардың өз үйлеріне оралуларына рұқсат берілген.

Сондықтан да, мегаполисте құрылған 66 уақытша эвакуациялық пунктіне тұрақтаған 10 мыңнан астам азаматтар бүгін таңғы сағат 6:00-ден бастап Түркістан облысы мен Шымкент қаласының әкімдігі ұйымдастырған көліктермен жолға шығып жатты. Сонымен бірге эвакуациялық пунктерден өзге туыстарының үйін паналаған Арыстықтар да Шымкент қалалық орталық «Ақмешіт» мешітінің алдында келіп, өз аймақтарына бет алды. Ал, ол жақта тиісті бекітілген қызметкерлер келушілерді күтіп алатын болады. Сағат 8:00-ден бастап Арыс қаласына кіру бағыттары толық ашылып, тұрғындар үйлеріне жайғастырылмақ. Сонымен қатар, оларды тамақтандыру бойынша екі күндік азық-түлікпен де қамтамасыз етілген.

Ал баспанасы жарамсыз күйге түскен тұрғындар Арыс қаласында уақытша тұрғын үймен қамтылатын болады. Қаланы қайта қалпына келтіру жұмыстары үшін әрбір аудан қала əкімдіктері бір штабтан құрып алдағы 1 ай мерзім ішінде Арыс шаһарын қалпына келтірмек.

Айта кетейік, тұрғындарды кіргізу үшін Арыс қаласы 17 секторға бөлінген. Бұл секторларға облысымыздың  аудан, қала әкімдіктерінен 640 жауапты (1 аудан — 40 адам) азамат бекітілді. Әрбір 10 үйге 1 қызметкерден жауапты. Тұрғындарды жайғастыру кезінде осы азаматтарға қаладағы көше, аулалардың белсенділері көмек беретін болады.

Апаттан зардап шеккен халыққа Қазақстанның өзге облыстарынан қажетті 150 тонна зат жиналған.