Браконьерлер қолға түсті. Табиғат қаскөйлері осы уақытқа дейін Мақтааралда тайраңдап жүрген. Олардың әрекеті адам өліміне дейін жетті. Басқа шыққан браконьерлер құрықтың қармағына ілініп, қолға түсті. Балықты заңсыз аулап жүргендерді кімдер қорғаштап жүр? Осы мәселе бұлыңғыр.
Мақтааралда «басқа шыққан браконьерлер» бассыздығы жүйеге айналған. Олар Сырдариядан балықты заңсыз аулап, жәйбарақат жүріп, еті үйренген. Мұнымен біз, біреуді даттап, қаралаудан аулақпыз. Бірақ, саусақпен санарлық су қорықшылары заң бұзушылармен күресуге шамасы жетпей жүр. Басынған брокеньерлер жағадан алған сәтте, құқық қорғау органдарының өзі әлсіздік танытып отыр. Прокурор, полиция, орман шаруашылығы, тіпті министрлікке қарайтын жауапты мекемелердің үнсіз отырғаны күдік ұялатады. Бәлкім, ұйымдасқан қылмыс пен сыбайластықтың ордасы осы бір «көлеңкелі» бизнесте шығар. Біздің аймақтың жауаптылары заңсыз істің дәл ортасында жүрген тобырға тыйым сала алмай жүргенде, табиғаттың жауһарларын жоғалтып жатырмыз. Балықтың уылдырықтары қалмай барады. Бейресми мәліметке сүйенсек, брокеньерлер бір күннің өзінде тонналаған балықты тысқа тасып үлгереді. Олар заңға пысқырған. Мысалы, күні бүгін 27-сәуірде электр тоғымен балық аулаған бір топ брокеньерлер ішінен үш адам қолға түсті. Дәл осы үш көліктің өзінде 150 кг жуық балық болыпты. Ең қызығы, қолға түскен қаскөйлер мінген мотоциклдерінің бірі де тіркеуде жоқ. Браконьерлердің арам пиғылын іске асыруда қолданатын мотоциклдерге неге салық төленбейді?
Сорақысы сол, бұған дейін ұсталғандардың ішінде тек браконьерлер емес, тіпті тәртіп сақшысының өзі де болған. Су қорықшыларының қолына түскен полиция қызметкерін табиғат жанашырлары бейнетаспаға да жазып алыпты.
Қалтасында қызметтік құжаты, оқталған тапаншасы бар тәртіп сақшысы бұл бассыздығынан соң ауыр жазалануы қажет болатын. Алайда полиция қызметкері заңсыз әрекетінен кейін де білек сыбана өз жұмысына қайта кірісіпті. Оның сұғанақ сыбайластыққа жол бермей жүргеніне кім кепіл? Бұл тұрғыда, Мақтаарал аудандық полиция басқармасының бастығы тиісті шешім қабылдамағанына қайран қаласыз.
Мәселеге Түркістан облысының әкімі Өмірзақ Шөкеевтің өзі баса назар аударып, бақылауға алуын қажет етіп отыр. Мәселен, Батыс Қазақстан облысында браконьерлерге қатаң шара қолданылып, заңсыз балық бизнесімен айналысып жүргендердің талайына тұсау салынып еді. Ал Түркістан облысындағы ұйымдасқан тобырға тіпті биліктегілердің тісі батпай жүр. Түркістан облысы полиция департаментінің бастығы Қайрат Дәлбеков дәл осы маңызды мәселеде, Маңғыстаудағы тәжірибесін іске асырса игі. Департамент бастығы балықтың заңсыз бизнесіне бей-жай қарамаса, көп ұзамай көлеңкедегі тірліктің ақ-қарасы анықталар. Заңбұзушылықтың тамырына балта шабылар деген үміттеміз.
