Сансыз баб жатқан — Сайрамда айтыс өтті

«Сансыз баб жатқан — Сайрамым». Дәл осы тақырыппен Сайрам ауданында айтыс өтті. Әр іс-шараның өзіндік түбірі бар, төркіні болады. Бұл айтыс жастар жылына орай ұйымдастырылып, таланттарды қолдау. Қазақтың төл өнерін насихаттауды мақсат еткен Сайрам ауданының әкімдігі жүлделі орынға бағалы сыйлықтар үлестірген.

210 мыңға жуық тұрғыны бар Сайрам ауданында айтыстың өтпегеніне талай уақыт өтіпті. Мұндағы ағайын өнерге сусып қалған. Айтысты аңсағандардың рухын көтеру үшін араға қаншама жыл салып, талантты жастар сахнаға шықты. Өнердің негізін салушы Құрманбек Жандарбеков атындағы мәдениет үйіне жиылған жұрттың төл өнерге деген қызығушылығына таңырқайсыз. Жырдың тума таланттарын қошеметпен ортаға шақырып, әр әзілге шапалақты аямай соғып отырды.   Сансыз баб жатқан мекендегі айтысқа сегіз бірдей жас ақын қатысты. Атап айтар болсақ, Шымкент қаласынан Ардақ Орынбек, Мейіржан Жақып, Нұрғали Әнәпиа, Сламхан Мұхамедхан, Түркістан қаласынан Рыскүл Досжанова, Төлеби ауданынан Абылай Құлтай,  Сайрам ауданынан Нұрдаулет Есіркеп, Жандос Мырзабеков. Қайран 25 жастың о жағы мен бұ жағында желкілдеп тұрған ақындар байыппен достықты, татулықты және 90 жылдық тарихы бар аймақты жырға қосты. Қожа Ахмет Ясауи дүниеге келген мекеннің қасиеті ақындарға шабыт қосты білем, сахнаға шыққан ақындарды белгіленген уақытта тоқтату мүмкін болмады. Домбыраны күмбірлетіп, қара өлеңмен жыр төккен ақындарға көрермен тұс-тұстан ысқырып, қиқулап жатты.Халқымыздың қанына сіңіп, өмірімен біте қайнасып, ғасырдан-ғасырға жалғасып келе жатқан айтыс өнердің төресі. Сол биік белесті биліктегі басшының түсінгені қуантты. Азулы ақындарды шақыртып, әділқазы етіп төрінен орын берген. Ал, көрерменге есікті тегін ашқан.Поэзия жанрының ішіндегі ең қиын, күрделісі — айтыс. Сол өнерден озып шыққандарды Сайрам ауданының әкімі марапатқа бөледі. Жандос Мырзабеков бас жүлдені қанжығасына байласа, Нұрғали Әнәпиа бірінші орынды иемденді. Жүлде алғандар тоңазытқыш, телевизор сынды сыйлықты алып қайтты. Шабытын шақырып, қара домбыраның күшімен дүбірлі дода көрсете білген ақындардың барлығы құр алақан емес. Осылайша, Сансыз баб жатқан Сайрам Наурыз мерекесі қарсаңында сөз өнеріне құрмет көрсетті.  

 «Айғақ-ақпарат».