Жетісай ауданында жалпы өңірлік өнім көлемі жыл сайын артып келеді. Атап айтқанда, іріленген Мақтарал ауданы бойынша 2016 жылы 112,6 млрд. теңге, 2017 жылы 138,0 млрд. теңге, ал 2018 жылы Жетісай ауданы бойынша жалпы өндірістік өнім көлемі 91,4 млрд. теңгені құрап отыр. Бұл туралы Асықата кентінің халқы алдында есеп берген Жетісай ауданының әкімі Жамантай Бейсенбаев мәлім етті, деп хабарлайды Жетісай ауданы әкімдігінің баспасөз қызметі.
Есеп беру жиыны барысында аудан әкімі 2018 жылы атқарылған жұмыстардың барысын жан-жақты баяндады. Тіпті тұрғындарға ауданның экономикалық дамуын егжей-тегжейлі баяндаған алдын ала бейнефильм де көрсетілді.
«Ауданда шағын кәсіпкерлік саласы да қарқынды дамуда. 2018 жылы тіркелген шағын және орта кәсіпкерлік субъектілерінің саны 15 320-ке жетіп, оларда 21,5 мың адам жұмыспен қамтылған. Шағын және орта бизнес өкілдері өндірген өнім көлемі 35 757,8 млн. теңгені құрады», — деді Жамантай Қанайұлы.
Бұдан бөлек, 2018 жылы түрлі саладағы ауданнан шыққан жеке кәсіпкерлер мен меценаттар есебінен 729,2 млн. теңгеге 50 әлеуметтік және кәсіпкерлік нысандары тұрғындардың пайдалануына тапсырылып, оларда 306 жаңа жұмыс орны ашылған. Сондай-ақ, Жетісай ауданынан жаңадан индустриалды аймақ құру мақсатында Жетісай қаласындағы бос тұрған 2 өндірістік кешен, Қазыбек би ауыл округіндегі 1 өндірістік кешен ұсынылуда. Сонымен қатар алдағы уақытта ауданымызда жаңадан көптеген инвестициялық жобаларды іске асыру жоспарлануда.
Есеп беру барысында Асықата кентінің тұрғындары жарыссөзге шығып, кент ішіндегі көшелердің бүгінгі жай-күйін, Жетісай қаласымен бірге даму қажеттігін көтерді. Сондай-ақ, газ тарифі, айыппұлы, стадион, жүзу бассейні қажеттігін көтерді.
Түсауа аудан әкімінің есебі Ш. Ділдәбеков ауыл округінде жалғасын тапты. Ауыл тұрғындары аудан әкімінің есебіне оң баға беріп, өз кезектерінде жол, ауыз су мәселелерін көтерді.
Ынтамақ ауыл округінің халқы да ауданда атқарылған жұмыстарға қанағаттарлық ықылас танытты. Сондай-ақ, олар да ағын су, жол секілді инфрақұрылымдық қиынықтардың туындап отырғанын жасырмады.
«Барлық мәселені бір күнде немесе бір айда шешіп тастау мүмкін емес. Сондықтан бүгінгі есепті кездесулерде айтылған сын-ескертпелердің бәріне дерлік зерделеу жұмыстары жүргізілетін болады. Ең бастысы, ауданымыз еншісін алып, енді еңсе тіктеп келеді. Аудан бюджеті де енді-енді нақтыланып, бірқатар оңды істерді бастағалы отырмыз. Салық көздерін көбейту мақсатында да қыруар шаруалар күтіп тұр», — деді Жамантай Қанайұлы.
