Бүгін Астананың төріндегі Ақордада «Айғақ» телеарнасының бас редакторы Тойболова Салтанат Хайруллақызы Қазақстан Республикасы Үкіметінің «Дарын» мемлекеттік жастар сыйлығымен марапатталды. Айта кетейік, бұл марапатты Түркістан облысы бойынша журналистердің арасында бағындырған алғашқы қаламгердің бірі — «Айғақ» телеарнасының қызметкері болып отыр.
Мектеп қабырғасында жүріп-ақ, шығармашылыққа бір табан жақын болған Салтанат Тойболова алғашқы еңбек жолын 2009 жылы «Айғақ» телеарнасында бастаған. Буыны әлі қата қоймаған алғыр қыз «Айғақ» телеарнасына келіп, телеарна басшысы Дулат Әбіштің ұстаздық етуімен журналистика саласына қанат қақты. Білімімен жұмысын қатар алып жүріп, мектепті аяқтады. 2012 жылы М.Әуезов атындағы Оңтүстік Қазақстан мемлекеттік университетіне түсіп, Филология факультетін Филология: қазақ тілі бакалаврі мамандығында оқып бітірді.
«Айғақтың» тәлім-тәрбиесін бойына сіңірген Салтанат Хайруллақызы бүгінде қаламы жүйрік жас журналист. Өне бойы өзгелерден озық тұратын қайсар қыз шабыты келгенде алдына жан салмай қағазын алып қаламын тербей жөнеледі. Әрине, бұл шабытқа қолдау танытып шабыт қоса түсетін ең алдымен Дулат Назарбекұлы. Осы тұста ол кісінің тың идеялары мен ауқымды жобалары барша «Айғақ» ұжымына тың серпін береді десек артық емес.
Міне, сол жүйелі жобалардың бірінде Салтанат Тойболова 2011 жылы алғаш рет ҚР Тұңғыш Президенті Нұрсұлтан Назарбаев білім алған Украинаның Днепродзержинск қаласындағы училище мен қызмет еткен домна пешінен арнайы репортаж жасады. Сондай-ақ, Ұлы Жеңісті жақындатқан жауынгерлердің ізімен Украинаға сапар шегіп, көрермендерге телехабар ұсынды. 2011 жылдың күзінде Ресей Федерациясының астанасы Мәскеу қаласында РСФСР төрағасының бірінші орынбасары болған, алаш қайраткері Тұрар Рысқұловтың ескерткіштақтайшасының ашылу рәсімінен дайындалған деректі фильм Оңтүстік көрермендеріне жол тартты.
Еңбегі еленген жас журналист 2011 жылы Шымкент қаласы әкімінің «Үздік» жастар премиясының «Үздік жас журналист» номинациясы, Оңтүстік Қазақстан облысы әкімінің «Үздік журналист» номинациясының иегері;
2015 жылы Оңтүсік Қазақстан облысы кәсіпкерлік, индустриалды-инновациялық және туризм басқармасы ұйымдастырған «Оңтүстік Қазақстан облысының туризмін дамыту әлеуеті» облыстық байқауының І орын иегері атанған. Сондай-ақ, 2012, 2016 және 2017 жылдары Оңтүстік Қазақстан облысы әкімінің Алғыс хатымен марапатталған.
Тұңғыш тарихшы Мұхаммед Хайдар Дулатидің жерленген жері Үндістанның Кашмир штатынан арнайы репортаж дайындаған шетелдік тәжірибесі жеткілікті журналист. Ал ең алғаш болып Елбасы курстастарын Украинаға сапарынан деректі фильм түсіріп, көреремен назарына ұсынған Оңтүстіктегі алғашқы тілші.
Біліктілігін арттыру мақсатында бірқатар шеберлік дәрістеріне қатысып, арнайы сертификаттарға ие болды. Атап айтқанда, атақты журналист, Корольдік астрономиялық қоғамының мүшесі, Лондондағы Ғылым мұражайының елшісі Тира Шубарттың арнайы дәрісіне қатысып, «Байқоңырдың әсері», CNN телеарнасы халықаралық жобалар бойынша шығарушы редакторы Райан Смиттің шеберлік сыныбына қатысып, «Жаңалықтар әлемінің келешегі» сертификаттарының иегері атанды. Сондай-ақ, Британияның Консулдығы мен АҚШ-тың Қазақстандағы елшілігінің ұйымдастыруымен өткен Журналистиканың ағылшын тілінің курсын меңгеріп, халықаралық сертификатқа ие болды.
Салтанат Хайруллақызы сонымен қатар, телеарнада бірнеше жобалардың авторы. Оның жетекшілігімен «Бетпе-бет», «Өнегелі өмір», «Сырлы сұхбат», «Қарышты қадам», «100 нақты қадам», «Сырлы тарихқа саяхат» және «Демалыс және туризм», «100 есім» атты хабарлары тұрақты түрде арнадан көрсетіліп келеді.
2016 және 2018 жылдары ХІІІ — ХV Еуразиялық Медиа Форумның делегаты ретінде қатысып, Еуропа мен Азиядағы өзекті мәселелер талқыланған пікірталас алаңынан арнайы хабар дайындады.
Еліміздің елеулі меретойлардың маңыздысы Қазақстан Республикасының Тәуелсіздігіне 25 жыл қарсаңында «Тәуелсіздік шежіресі» тақырыбында тың тақырыптарды қозғап, көрермен назарына ұсынды. Сондай-ақ, Оңтүстік Қазақстан облысының әлеуметтік-экономикалық, мәдени дамуы туралы сюжеттер, хабарлар және арнайы репортаждарды үздіксіз жүргізіп келеді. Қазіргі таңда «Айғақ» телеарнасының бас редакторы. Отбасылы, екі ұл бір қыз тәрбиелеуде.
«Айғақ-ақпарат».
