«1 желтоқсан — Тұңғыш Президент күніне» орай ұйымдастырылған Мемлекет басышысының курстастарымен жастардың кездесуі SILK WAY халықаралық университетінде жалғасын тапты.
Бұл күні алғашқы болып SILK WAY халықаралық университетіне табан тіреген Елбасының курстастары, КСРО Мемлекеттік сыйлығының лауреаты, Қазақстанның «Құрметті металлургі», Шымкент қаласы мен Оңтүстік Қазақстан облысының «Құрметті азаматы» Аманәлі Әбдіраманов қатысты. Сондай-ақ, Түлкібас ауданының, Оңтүстік Қазақстан облысының «Құрметті азаматы», Қазақстан Республикасы Білім беру ісінің үздігі Марат Қыстаубаев және Қазақстанның «Құрметті теміржолшысы», Түркістан қаласының «Құрметті азаматы» Әсетулла Каримов. 
Мұнда қонақтар ең алғашқы болып аталған университет тарихымен танысып, Елбасы құрметіне ашылған бірқатар арнайы кабинеттерді аралады.
Нұрсұлтан Назарбаевтың кітаптары мен ғұмырынан мағлұмат беретін бірқатар құжаттарға толған бөлмені көріп, Ұлт көшбасшысының курстастары өздерінің таңданысын жеткізді. Сонымен қатар, игі жұмыстар атқарып отырған университет ұжымына алғыстарын білдірді. 
Кабинеттерді аралап біткен ел ағалары оқу ордасының арнайы мәжіліс залына барып жастармен кездесуін жалғастырды. Елбасының салиқалы саясатын тілге тиек етіп, «Ұлы даланың жеті қыры» атты мақаласын талқылады. Осы орайда жастармен жүздескен алқалы азаматтар өздерінің тұшымды ойларын жеткізіп, еліміздің жарқын болашағына жол бастайтын жастар екендігін айтты. Сондай-ақ, болашақ маман иелеріне өз өсеиеттерін айтып, бағыт-бағдар берді.
Ұлдархан Уәлиханқызы.
