Елімізде көмір арзандайды. Үкімет келер жылдан бастап қара отынның құнын 20 процентке дейін төмендетуді көздеп отыр, деп хабарлайды «Хабар 24».
Инвестициялар және даму министрлігі жергілікті әкімдіктер және көмір тасымалдаушылармен ортақ меморандум бекітіп жатыр. Үкімет отырысында айтылған ақжолтай хабар бұл ғана емес. Ел ішінде жылу мен жарық құны да айтарлықтай төмендейді. Тек азық-түлік бағасы ырыққа көнбей тұр.
Қатулы басталған жиын жауаптылар жөңкіле сөйлегенде бірте-бірте жіби түскендей болды. Мінбердегі министрлер шетінен ақжолтай ақпар айтумен болды. Сүйіншіні алдымен Қанат Бозымбаев сұрады. Энергетика министрі жылу мен жарықтың құнын біршама төмендетудің амалын тауыпты. Олар электр қуатын өндіретін компанияларға берілетін газдың шектік бағасын 22 пайызға дейін арзандатқан. Сәйкесінше, қуат көзі де елге енді төмендетілген тариф бойынша таратыла бастайды.
Қанат Бозымбаев, ҚР Энергетика министрі:
– Энергия өндірушілердің тарифтерін төмендету мақсатында Ұлттық экономика министрлігімен бірлесіп, тауарлық газдың көтерме шекті бағасын төмендету бойынша бұйрық жобасы әзірленді. Біздің есебімізше, көтерме баға төмендесе, 2019 жылдың қаңтарынан бастап өңірлерге байланысты газ пайдаланатын электр стансалары үшін тауарлық газдың түпкілікті бағасы 12 пайыздан 22 пайызға арзандайтын болады. Қыстың көзі қырауда жылуға жарымай жүрген жандарды Жеңіс Қасымбек те қуантып тастады. Инвестициялар және даму министрі келер жылдан бастап елімізде көмір құны 18 пайызға төмендейді деді. Шамамен 3 мың теңгеге арзандайды. Қазірдің өзінде қай өңірде отын құны қандай болатыны белгілі болған. Мәселен, Ақмола мен Солтүстік Қазақстан облыстарында 1 тонна көмірдің құны 2200 теңгеге, Алматы облысында 3 мың теңгеге, ал Шымкентте 2 жарым мың теңгеге арзандайды.
Жеңіс Қасымбек, ҚР Инвестициялар және даму министрі:
– Солтүстік Қазақстан, Шығыс Қазақстан, Қарағанды, Ақмола, Қостанай және Алматы облыстарының жергілікті атқарушы органдары өңірлерде орналасқан қойма иелерімен меморандумдар жасасты. Қалған өңірлер де осындай меморандумға қол қою жұмыстарын жүргізуде. Қара отын құнының төмендеуіне тараптардың өзара уағдаластығы түрткі болған. Министрлік тау-кен өндіру кәсіпорындарымен және өңірдегі әкімдік өкілдерімен бірлесіп, меморандум жобасын әзірлепті. Бірақ аймақ басшыларының барлығы бірдей бұл бастамаға үн қатпаған. Министр қалыс қалғандарға тездету керектігін ескертті.
Жеңіс Қасымбек, ҚР Инвестициялар және даму министрі:
– Жергілікті атқарушы органдардың меморандум жасасуды жылдамдатулары қажет. Осы жұмыстың нәтижесінде біз көмір қоймалары мен бөлшектеп сату орындарындағы бағаны төмендетуді жоспарлап отырмыз. Президенттің ай басында Қауіпсіздік кеңесінде айтқан ескертпесінен кейін, сала жауаптылары шалт қимылдай бастағандай. 2019 жылы байланыс қызметінің тарифтері де төмендейтін болды. Енді, интернетке де бұрынғыдай көп қаражат шығындамайтын болдық.
Динара Щеглова, ҚР Ақпарат және коммуникациялар министрінің орынбасары:
– Келесі айдың соңына дейін қолжетімді әлеуметтік тарифтер пакетін әзірлеп, байланыс бағасын төмендету ұсынылды. Аталған тарифтік пакеттер бойынша ақпарат БАҚ-та жарияланады. Министр біткен осылай сүйіншілеп жатқанда, Тимур Сүлейменов бағамен әлі алысып жатқандарын айтып, тосырқап қалды. Ұлттық экономика министрі азық-түлік өнімдерінің құны төмендеген жоқ, керісінше жыл басынан бері 1,9 пайызға қымбаттады деді. Құнның ырыққа көнбеуіне ортақ нарықтағы бағаның дес бермей жатқаны себеп екен.
Тимур Сүлейменов, ҚР Ұлттық экономика министрі:
– Өткен аптамен салыстырғанда, бағалардың индексі 0,2 пайызға өсті. Жылдың басынан бері бағалардың жоғарлауы 1,9 пайызды құрап отыр. Бағлалардың өсуі қант, қырыққабат, күріш, тауық еті сияқты азық-түлік өнімдерінде байқалуда. Азық-түлік тауарлары бағаларының негізгі өсу себептері ЕАЭО нарығында өнімдердің қымбаттауы, сондай-ақ өзіндік құн құрылымындағы үстеме шығыстардың өсуі болып табылады. Барлығын бүкпесіз баяндаған Тимур Сүлейменов бағаны реттеуге әкімдер де атсалысса дейді. Өйткені, құнды құбылтып отырған көбіне ортадағы делдалдар.
Мысалы, жыл басынан бері қант — 23,4 пайызға, орамжапырақ – 13, күріш – 12,6, ал тауық еті 11,1 пайызға қымбаттаған.
Тимур Сүлейменов, ҚР Ұлттық экономика министрі:
– Тауық еті бағасының өсуі, негізінен құс етінің шамамен 50 пайызы АҚШ-тан импортталатынына байланысты. АҚШ доллары бағамының өсуі импортталатын тауық етінің қымбаттауына алып келуде. Бұған дейін ресейлік күнбағыс майын Түркияға экспорттау бойынша баж салығы 36% құрады. Осы баж салығының күші жойылғаннан кейін ресейлік күнбағыс майының экспорты түрік нарығына қайта бағытталды. Министрлердің мәлімдемесін тыңдаған Үкімет басшысы бағаны қалай да тежеу керектігін айтты. Бұл міндет әкімдерге де жүктеліп отыр. Өңір басшылары азық-түлік нарығындағы делдалдарды жойып, құнның енді өспеуін қатаң қадағалау керек.
Дереккөз: 24.kz.
