Түркістан облысының отбасы, балалар және жастар істері жөніндегі басқармасы мен «Жастар ресуртық орталығы» білімпаздарға көтеріңкі көңіл-күй сыйлады. Халықаралық студенттер күніне орай Түркістан қаласында ұйымдастырылған шаралардың бірі «Терең тарихтан – жарқын болашаққа» атты пікірсайыс турнирі. Екі күнге созылған турнир мәресіне жетіп, облыс әкімінің арнайы сыйлықтарымен марапатталды. Іс-шара Есімхан алаңында эстрада жұлдыздарының гала концертімен аяқталды.
Елбасы биылғы Жолдауында «Жастардың барлық санатын қолдауға арналған шараларды толық қамтитын әлеуметтік санатының ауқымды платформасын қалыптастыру керек. Келесі жылды «Жастар жылы» деп жариялауды ұсынамын» деген болатын. Жастарды қолдауда, олардың бойында отансүйгіштік пен елжандылықты оятуда айтарлықтай ат салысып келе жатқан Түркістан облысының отбасы, балалар және жастар істері жөніндегі басқармасы мен «Жастар ресуртық орталығы». Еліміздің әр аймақтарындағы белсенді, от ауызды, орақ тілді пікірсайысшыларының басын «екі дүниенің есігі» Түркістанда біріктірді. 
Рухани астананы көзбен көруді жүлдеден биік қойған студенттер қуаныштары мен ризашылықтарын жасыра алмады. 200-ден астам студенттер қатысқан бұл турнир осы күнге дейін өткізіліп келген турнирден өзгерек болды. Себебі, жерлестеріміз қонақтарға арнап экскурсия ұйымдастырған. «Арыстанбабта түне, Түркістанда тіле» дегенді көне күннен естіп өскен жастар салтты бұзбады. Талай жастың арманы орындалды. Екі күнге созылған турнир аяқталып, жеңімпаздар облыс әкімінің қаржылай және естелік сыйлықтарымен марапатталды. Бірінші орын Астана қаласының студенттеріне бұйырса, екінші орынды Алматы және Шымкент қаласының жастары бөлісті, жүлделі үшінші орын Жамбылдықтардың еншілерінде. Көңілдері жайланған, арқаларынан жүк түскен барлық қатысушылар мен студенттер, қала тұрғындары мен қонақтары арнайы Халықаралық студенттер күніне орай ұйымдастырылған гала концертте бас қосты.
Эстрада жұлдыздарынан Қайрат Түнтеков, Ғазизхан Шекербек және бірнеше жергілікті әншілер өнер көрсетті. Ауа райының салқындығына қарамай би билеген жастар көтеріңкі көңілмен тарасты. Білім жолы даңғыл жол. Табандылық пен талапты қажет етеді. Тың идеялар мен жаңа көзқарастар туындайтын болашақтың бастауы да сол жолда. «Тарихтан күл емес, от аламыз» деген студенттерге білімнің биігіне шығып, шыңдарына шығыңыздар дейміз.
Айтолқын Молдабекова.
