Бүгін Түркістан облысының әкімі Жансейіт Түймебаев Мақтаарал ауданына арнайы жұмыс сапарымен барып, ауданның 90 жылдық мерейтойына қатысты.
«Ақ алтын» мәдениет үйінде өткен ауданның 90 жылдық мерекесінің ашылуына қатысқан Түркістан облысының басшысы еңбекқор мақтааралдықтарға деген ізгі тілегін арнады.
«Облысымыздың басқа аудандары сияқты мақталы Мақтааралдың да тарихы өте бай. Аңызға бергісіз әңгімелері мен оқиғалары да сан алуан. Алғашында Мырзашөл атауымен белгілі болған бұл мекеннің ерекшелігі — жердің жомарттығында, мақтааралдықтардың ерен еңбегі мен ақылы — шөл даланы гүлді, жазиралы жәннәт мекенге айналдырды. Мырзашөл даласын суландырудағы негізгі мақсат — мақта алқабын молайту еді. Алғаш рет ауданда мақта шаруашылықтары құрылып жатқанда Түркістан жер шаруашылығы халық комиссары қызметін атқарып жүрген ұлт мақтанышы Сұлтанбек Қожанов каналды қазушылармен болған кездесуінде мақтаның аса қымбат шикізат екенін, болашақта ақ алтын күллі Түркістан өлкесінің байлығы болатынын айтқан екен. Міне, Елбасымыздың тікелей қолдауымен Түркістан облысының жаңа дәуірі басталып келеді. Облысымыздың қиыр оңтүстігінде орналасқан, ақ алтынның ордасы — мақталы Мақтаарал ауданының мерейлі мерекесі бәрімізге ортақ мақсат — той тойлау емес, бір ғасырға жуық уақыт аралығындағы оқиғаларды ой елегінен өткізу. Елдің бірлігін нығайтып, игі іске жұмылдыру» — деді облыс басшысы Жансейіт Қансейітұлы. Мұнан соң Түркістан облысының әкімі Мырзакент кентінің орталық алаңында өтіп жатқан күзгі жиын-терім науқанын қорытындылауға арналған «Алтын күз — 2018» шарасында аялдады. 
Биыл мақтааралдық диқандар 60 926,3 гектар жерге егістік ексе, оның 38 593,2 гектары мақта дақылы болатын. Аудан бойынша бүгінге дейін 96 мың 600 тонна «ақ алтын» жиналды. Мақташылардың бұл жетістігі ауданның 90 жылдығына тамаша тартуы болды. 
Жалпы үш күнге жоспарланған Мақтаарал ауданының 90 жылдық мерейтойы «Терме бойтұмарым» атты термешілер байқауы, «Бауырсақ фестивалі», «Палау фестивалі» іс-шарасы, жастар арасында «Жайдарман» ойындары, мерекелік концерттер, отшашулар және Жетісай аудан өнерпаздарының «Мырзашөлім — мырза елім!» атты концертімен жалғаспақ.
Салтанат Тойболова.
