Бүгін Түркістан облысының әкімі Жансейіт Түймебаев облыстық сәулет және қала құрылысы басқармасы жанындағы архитектуралық бюросында ҚР Сәулетшілер Одағының вице-президенті Бақытжан Әшірбаевпен кездесіп, Түркістан қаласының бас жоспарында қамтылатын нысандардың орналасу тәртібі, сәулеттік келбеттің ерекшеліктерімен танысты.
Әкімшілік іскерлік орталығында тек қана ғимараттар ғана болмайды, бұл жерде жаңа үлгідегі көпқабатты тұрғын үйлер салынады. Бірінші кезең 2018-2020 жылды қамтыса, екінші кезеңде 2021-2023 жылға дейін 1,5 мың гектар тағы қосылып, екі мың гектар жерге созылып, егжей-тегжейлі жобасы жасалынады. Бастапқыда жоспар бойынша 50 мың халыққа шақталып құрылыс жүргізілсе, халық саны 120-150 мыңға дейін жететіні де ескерілген.
Түркістан қаласын дамыту туралы Тұжырымдаманың басты мақсаты мəдени-тарихи жəне рухани мұраның сақталуын қамтамасыз ететін түркі əлемінің орталығы ретінде қаланы одан əрі дамытудың негізгі бағыттарын айқындау, сондай-ақ Түркістанды маңызды өңірлік даму орталығы етіп қалыптастыру болып табылады. Тұжырымдамада Түркістан қаласының халықаралық, туристік жəне өңірлік тұрғыдан перспективалары айқындалды, қаланың əлеуметтік-экономикалық əлеуетін, оның аумағының перспективада жоспарлы ұйымдастырылуын, қала құрылысы аймақтарына бөлінуін, ашық қоғамдық кеңістіктердің, тарихи-тақырыптық парктің, экологиялық стандарттардың, тұрғын үй-коммуналдық инфрақұрылымның жүйесін қалыптастыруды қамтитын, тұрғын халық санының ұзақ мерзімді кезеңге болжамды ұлғаюын ескере отырып кешенді дамыту көзделген.
