2018 жылы 28 қыркүйекте Түлкібас ауданының 90 жылдығы аталып өтті. Осы мереке қарсаңында «Түлкібас ауданына — 90 жыл» атты кітап шығарылып, мерекега қатысқан қонақтарға тарту етілді.
Түлкібас ауданының әкімі Нұрбол Тұрашбековтың аталған кітапта айтқан алғы сөзінен сіздердің назарларыңызға үзіндісін ұсынып отырмыз.
«Құт қонған, бақ дарыған киелі мекен»
«Қазақ елінің Ұлы даладағы киелі де қасиетті бір бөлшегі – Қаратау мен Алатаудың түйіскен тұсында орналасқан Түлкібас өңірі бұұрынғы кезеңнен ата-бабаларымыздың құтты мекені, өркениеттің ордасы болған…
… Тәуелсіздік таңы арайланып атқалы бері азаттық шарапатына түлкібастықтар да кенеліп отыр. Тәуелсіз еліміздің Тұңғыш Президенті, Елбасы Нұрсұлтан Назарбаевтың ішкі және сыртқы саясатта жүргізіп отырған салиқалы бағдарларының арқасында жемісті де жеңісті өсіп-өркендеу жолындамыз, еліміздің әлеуметтік-экономикалық әлеуеті үдемелі қарқынмен дамып, халқымыздың әл-ауқаты жақсарып отырғанына куәміз. Бұл үрдіс біздің ауданымыздан байқалады. Ауданымызда әлеуметтік мәселелердің 95-98 пайызы шешімін тапқан. 59 елді мекен табиғи газбен қамтылған, ауыз суды орталықтандырылған ауыз су құбырлары арқылы тұтынады. Тәуелсіздік жылдары жаңадан 25 мектеп құрылысы жүргізіліп, пайдалануға берілді. Бүлдіршіндерімізге балалар бақшасымен қамту 92 пайызды құрап отыр. Елбасы шағын және орта кәсіпкерлікті экономикамыздың локомотивіне айналдыру қажеттігін ұдайы айтады. Бұл тұрғыда бизнестің көкжиегін кеңейтуде нақты қадамдар жасалып жатыр.
Тарихы терең Ұлы Даланың бір бөлшегі – Түлкібастың кешегісі қандай күрделі де мәнді болса, болашағы баянды да сәнді. Биыл ауданымыздың құрылғанына 90 жыл толып отыр. Ауданымыздың іргетасы 1928 жылы 17 қаңтарда қаланған. Бес жылдай Жамбыл облысының Жуалы ауданына қосылып, көрші өңірдің құрамында болды. Ауданымыздың 90 жылдығына орай, аудан тарихына үңіліп, өткен-кеткенді түгендей, Елбасымыздың «Болашаққа бағдар: рухани жаңғыру» мақаласымен үндесіп жатқандықтан, әрі Сарыарқа төріне орын тепкен айбынды Елордамыз Астананың 20 жылдығы мерейтойымен ұштастырып, Түлкібас ауданының 90 жылдығын атап өтуді жөн санадық. Осы мерейлі датаға байланысты ауданның құрылған кезінен бастап, толық мағлұмат беретін, Тәуелсіздік жылдарында жеткен жетістіктеріміз көрініс тапқан кітап оқырман қауымға жол тартты. Елбасы «Болашаққа бағдар: рухани жаңғыру» мақаласында «Туған жердің әрбір сайы мен қырқасы, тауы мен өзені тарихтан сыр шертеді. Әрбір жер атауының төркіні туралы талай-талай аңыздар мен әңгімелер бар. Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар. Осының бәрін жас ұрпақ біліп өсуге тиіс» деді.
Ауданымыздың 90 жылдығына орай қағазға хатталып, тасқа басылған рухани дүние Елбасымыздың осы талаптарын негізге алды. Кітапты шығаруда деректерді жинастыру үшін елімізге есімдері танымал ғалым, белгілі қаламгер ағаларымызбен бірге, жергілікті журналистерді, әдебиетші, тарихшы мамандарды жұмылдырдық. Ұлттық тарихымыздың бір үзігі ауданның құрылу, қалыптасу, даму, өсіп-өркендеу жолдары баяндалған кітапты, рухани тәбәрікті болашақта атқарылатын үлкен іс-шараларының бастамасы ретінде қабыл алыңыз, мәртебелі оқырман».
«Айғақ-ақпарат».
