Еліміздің белгілі кәсіпкерлерінің қолдауымен ашылған қордың мақсаты жоғары білім алуға мүмкіндігі жоқ дарынды жастарға көмек көрсету. Сапалы мамандардың жетілуіне үлес қосатын жоба алдағы уақытта 4 бағыт бойынша жұмыс жасайды.
Мемлекет басшысы халыққа жолдаған дәстүрлі Жолдауында «Жастар мен отбасы институтын қолдау» мемлекеттік саясаттың басымдылығына айналуы тиістігін айтқан. Осы мақсатта жастардың сапалы білім алуына, білікті маман атануына қолдау көрсететін «Кемел болашақ» қоры құрылды. Қор «Болашаққа бағдар: Рухани жаңғыру» бағдарламалық мақаласы аясында ұйымдастырылған. Қоғамның назарын дарынды және табысты жастарға аударуды көздейтін жоба 10 түрлі салаға басымдық берген.
Бұл мамандықтар қазіргі таңда азаю үстінде. Мәселен, жоғарғы оқу орнына түсетін жастар педагогика, агрономия, спорт, әлеуметтану секілді саланы таңдамайтын болған.
Қазақстанның әлемдегі дамыған елдердің қатарында өркендеуі бүгінгі студент жастарға көмек қолын созудан басталады деп санайды қор ұйымдастырушылары. Жалпы, қоғамдық қор алдағы уақытта 4 бағдарламаны жүзеге асыратын болады.
Атап айтсақ, мұғалім мамандығын таңдаған студентке айына қосымша 30 мың теңгелік степендия беріледі. Білім гранттарын ұсынып, «Болашақ мұғалім» бағдарламасын жүзеге асырмақ және студенттердің жұмысқа орналасуын да қамтамасыз етуді көздейді. «Кемел болашақ» қорын қолдауға көптеген кәсіпкерлері ниет білдіруде. Халықтың әлеуметтік осал топтарындағы жастарды қолдауға бағытталған қоғамдық қор бүгінде 40 қа жуық студентке көмек қолын созған. Алдағы уақытта бұл санды 200-ге жеткізуді жоспарлап отыр.
Аруна Пернебек.
