Тарихқа тұнған шаһардың басшысы Асқар Мырзахметовтің бастамасымен Әулиеата өңірінің тумасы, халық қаһарманы Қайрат Рысқұлбеков атындағы саябақ қайта жаңғыртылды. Саябақты жаңғыртудағы Асқар Исабекұлының мақсаты «Желтоқсан» құрбандарына құрмет көрсетіп, Тәуелсіздік жолына із салғандарды өскелең ұрпаққа жеткізу. Жас ұрпақтың Отанға деген патриоттық сезімдерін күшейте түсу.
Саябақтың жалпы аумағы — 6,5 га.
Саябақтың ескі жобасында Қайрат Рысқұлбековтың тек бюсті ғана болса, бүгінде оның орнына халық қаһарманының толықтай ескерткіші орнатылды. Ескерткіштің биіктігі — 2,8 метр.
Сонымен қатар, саябақ алдына батырдың есімі жазылған маңдайшамен Елбасы Нұрсұлтан Назарбаевтың және өзге де ұлы тұлғалардың Тәуелсіздікке жету жолындағы айтылған, ел рухын көтеретін дәйекті сөздері жазылған тақталар қойылған.
Сондай-ақ, Желтоқсан оқиғасының тарихынан сыр шертер «Желтоқсан-86» орталығы ашылды. Аталмыш орталықтың жалпы аумағы 280 шаршы метр. Тарихи орталықта халық батырының жеке заттары мен оқиғаға қатысты құнды деректер жинақталған бұрыш, Жамбыл облысынан қатысқан жастар туралы деректер және белгілі тұлғалардың жазбалары мен БАҚ материалдарынан құралған көрме орналастырылған.
Ұлттық құндылықтармен толысқан саябақта «Тәуелсіздік ұшқыны» стелласы орнатылған аллея ашылды.
Архитектуралық элементтің ені 4,4 метр, биіктігі — 4,6 метрді құрайды. Ондағы алау оты жалындаған жастардың Тәуелсіздікке деген ұмтылысын, ерік-жігерін білдіріп тұрғандай-ақ.
Негізгі идеялық мазмұны — қазақ жастарының азаматтық намысы мен жігерінен бастау алған қозғалыстың нәтижесінде Тәуелсіз ел құрылғанын бейнелеу.
«Айғақ-ақпарат».
