Түркістан облысының әкімі болып Ж.Түймебаев тағайындалды

Тарихи сәт. Бүгін кезектен тыс ХХIV сессия өтті. Үкімет басшысы Бақытжан Сағынтаевтың төрағалығымен  өткен алқалы жиынның күн тәртібіндегі басты мәселе жаңадан құрылған Түркістан облысына әкім тағайындау. Облыстық мәслихат депутаттары Түркістан облысының әкімі болып Жансейіт Түймебаевтың тағайындалуын бірауыздан қолдады.

«Мемлекет басшысының Жарлығымен Жансейіт Қансейітұлы Түймебаев Түркістан облысының әкімі болып тағайындалды», — делінген Ақорданың Twitter желісіндегі хабарламасында.

Естеріңізге сала кетсек, 19 маусымда Елбасы Нұрсұлтан Назарбаев «Қазақстан Республикасының әкімшілік-аумақтық құрылысының кейбір мәселелері туралы» заңға қол қойған еді. Жарлыққа сәйкес, Шымкент қаласы республикалық маңызы бар қалалардың санатына жатқызылып, Оңтүстік Қазақстан облысының әкімшілік орталығы Шымкент қаласынан Түркістан қаласына көшірілді. Сондай-ақ, Оңтүстік Қазақстан облысы Түркістан облысы деп қайта аталды.

Түймебаев Жансейіт Қансейітұлы 1958 жылы дүниеге келді, филология ғылымының кандидаты, профессор. Оңтүстік Қазақстан облысында туған. Қазақ мемлекеттік университетін, Мәскеу мемлекеттік әлеуметтік университетінің зан факультетін бітірген. 1980-1993 жылдары — Қазақ мемлекеттік университетінің ассистенті, аға оқытушысы, доценті. 1993-1994 жылдары — Қазақстан Республикасы Сыртқы істер министрлігінің бірінші хатшысы, бөлім бастығы. 1997-1999 жылдары — Қазақстан Республикасы Президенті протокол қызметінің бас сарапшысы, Қазақстан Республикасының Стамбул қаласындағы Бас консулы, 1999-2004 жылдары — ҚР Президенті протоколының бастығы, 2004-2006 жылдары — Қазақстан Республикасы Президенті протоколының бастығы — Қазақстан Респубилкасы Президентінің кеңесшісі. 2006-2007 жылдары — Қазақстан Республикасының Ресей Федерациясындағы Төтенше және Өкілетті Елшісі. Қазіргі қызметінде 2007 жылдан бастап істейді. Жансейіт Қансейітұлы Түймебаев 2016 жылдың қазанынан бері бұрынғы Оңтүстік Қазақстан облысы әкімі қызметін атқарған еді.