«Шымкен сити» қалашығында ақылды үйлер бой көтермек

Жуырда ғана Республикалық маңызы бар қала статусына ие болған Шымкент шаһарында енді замануи үлгідегі көпқабатты тұрғын  үйлер бой көтермек. Яғни, «Шымкент сити» қалашығында биылғы жылдан бастап әлемге әйгілі  «Highvill» компаниясы 18 қабатқа дейінгі ақылды үйлер құрылысын жүргізетін болады.  Бұл мақсатқа Кореялық алпауыт компания тарапынан 157 миллиярд тенге инвестиция тартылса, құрылыс алаңына қалашықтан  51 гектар жер телімі  бөлінген.  Міне осындай ауқымды жобаны жүзеге асыру бойынша бүгін құрылыс компаниясы мен  «Шымкент» әлеуметтік кәсіпкерлік корпорациясы және қала әкімдігі арасында бірлескен үш жақты меморандумға қол қойылды.

«Шымкент сити»  қалашығы  қаланың солтүстік аймағында яғни  Бәйдібек би ескерткішінің маңында орналасқан  он екі орамнан тұратын тұрғын үй кешені. Еліміздегі үшінші мегаполис статусына ие шаһарымызда жүзеге асырылып жатқан жобаға сәйкес бұл аймақта болашақта көптеген нысандар бой көтереді деп жоспарланған болатын. Айталық шағын және орта кәсіпкерлік нысандарынан бастап, сауда-саттық, ойын-сауық орталықтары, емхана мен гүзарлар  және демалыс аймақтары салынады. Сондай ақ әрбір орамға мектептер мен балабақшалар, түрлі санаттағы тұрғын үйлер салу да қарастырылған. Міне осындай ауқымды жобаға байланысты жүргізілген ұзақ мерзімді келіссөздер нәтижесінде әлемге әйгілі «Highvill» компаниясы  «Шымкент сити» қалашығынан жоғары класты тұрғын үйлер құрылысын жүргізуге ниет танытып отыр.

Кореялық «Highvill» алпауыт  құрылыс компаниясы 1989 жылы құрылған. Ал, Қазақстандық құрылыс нарығында 2004 жылдан бері жұмыс істеп келе жатқан мекеме Елордамыз Астана қаласында  ақылды технологиямен көптеген тұрғын үйлердің құрылысын жүргізген. Ал, сапалы қызметтері үшін көптеген марапаттарға ие болған  бұл ұжым  Корея Республикасында үздік тұрғын үй  компаниясы деп танылған. Ендігі жерде «Шымкент сити» қалашығынан да 2 қабаттан бастап 18 қабатқа дейінгі ақылды үйлер құрылысын жүргізуді жоспарлап отырған компания бұл жобаға 157 миллиярд тенге инвестиция салып отыр. Ал, тиісті құрылыс жұмыстары үшін  51 гектар дан астам жер бөлінсе, жобаның жүзеге асырылу барысы 10 жылды құрайды.

 Тұрғын үй құрылыстарын салуда ыңғайлылық пен инновацияға басымдық беретін «Highvill» компаниясы «Шымкент сити» аумағындағы ауқымды жобаның жүзеге асырылу барысында жалпы саны 5 мың 500 пәтерді пайдалануға беруді жоспарлап отыр. Міне осындай ауқымды жобаны жүзеге асыру бойынша бүгін құрылыс компаниясы мен  «Шымкент» әлеуметтік кәсіпкерлік корпорациясы  және қала әкімдігі арасында бірлескен үш жақты меморандумға қол қойылды.

Үшжақты меморандум нәтижесінде алдағы екі ай көлемінде «Шымкент сити» қалашығында  заманауи үлгідегі ақылды тұрғын үйлер құрылысы жүргізіле бастайды. Ал, бұл жобаға   инвестор есебінен  бағытталғалы  отырған қаржы  Шымкент қаласына тартылған ең үлкен көлемдегі инвестиция болып табылады.

Абай ОМАР.