«Ұлы бабалар ізімен…» жобасы аясындағы «Айғақ» қоғамдық телеарнасының қолға алған тағы бір топтамасы бұл жолы Қазақ Хандығының 550 жылдығына арналып отыр. Киелі Оңтүстіктен бастау алатын тағлымды сапар Қызылорда, Ақтөбе, Қостанай, Солтүстік Қазақстан, Ақмола облыстарына экспедиция жасалынып, деректі фильм 6 бірдей өңірдің тарихын қамтиды. Ұлы Жібек жолының бойындағы тарихи қалалардың таңбасы да біздің арнамыздан тыс қалмақ емес. Алдымен, шежірелі аймақ Мәртөбенің биігінен бастау алған жоба Ордабасы ауданында да жалғасады. Мәртөбе – Қазақ Хандарының басын қосып, үш бидің елді бірлікке шақырған өлкесі ретінде таныс. 17 ғасырдың орта шенінде маңызды жиындар дәл осы Мәртөбеде өткізілген. Яғни, 1684-1718 жылдары Тәукехан бастаған Төле би, Қазыбек, Әйтеке би сынды қазақтың ірі тұлғалары мемлекеттік саясатты нығайту — елдің ынтымағы мен бірлігін арттыру мақсатында халықтық жиындар ұйымдастырып отырған. Мәртөбеде қазақ халқының алғашқы ата заңы «Жеті жарғыға» қол қойылған. Тәуке хан мен үш бидің табаны тиген жерге жоба жетекшісі, «Айғақ» Телерадиокомпаниясының президенті, облыстық мәслихатының депутаты Дулат Әбіш бастаған экспедициялық топ арнайы барып, бабалар аманатын ұлықтады. Ұлы Отан соғысының зұлмат жылдары жолымен Ресей қалаларына, Польша, Латвия, Германия, Украина, Белоруссия елдеріне жасалған сапар барысында Еуропаның төрінде желбіреген көк байрағымыз Мәртөбеде де биікке көтерілді.
Ерлан АЙТАХАНОВ, Оңтүстік Қазақстан облыс әкімінің орынбасары:
Мәртөбені даланы парламенті деп айтуға болады. «Жеті жарғыға» мөр басылған тарихи, қасиетті жер. «Конституцияның 20 жылдығы» қарсаңында бастау алған марш барша халықты қуантты. Оңтүстік Қазақстан облысы мәслихатының депутаты Дулат Әбіштің тың жобасы кеемеңгер тұлғалардың ерлігін ұлықтап, есімін таныстыру. Бүгінгі күн үшін экспедицияның маңызы зор. Сондықтан, сәт-сапар болсын!
Иә, Тәуке хан «Жеті жарғыға» мөрді осы төбеде қойған. Қазақ тарихында Мәртөбе дала парламентінің рөлін атқарған орын ретінде белгілі.
Сайлау ҚҰЛМАНОВ, Төлеби аудандық мәслихатының депутаты:
Қазақ Хандығының – 550 жылдығына орай, облыстық мәслихатының депутаты, «Айғақ» телерадиокомпаниясының президенті Дулат Әбіштің бастаған бұл ісі оңынан болсын. Шынымды айтсам, мұндай жобаның қолға алынғанын есітіп, өзім қуанып қалдым. Өйткені, жас мемлекетіміз үшін тарихымыздың өткенін танытып, бүгінгі қоғамның бетіне шығару үлкен сауапты еңбек деп білемін.
Әнуарбек БЕЙСЕ, «Ұстаз нұры — Информ» газетінің бас редакторы:
Мектеп оқулықтарында, әсіресе, тарихында Мәртөбенің мәртебесі туралы оқытылғанымен, оқушылар бұл тарихи жердің дәл осында орналасқандығын біле бермейді. Мұндай маңызды орынды көзбен көрудің өзі адамға үлкен серпіліс береді. Сондықтан, тарих таңбасын қалдырған мекендерге жасалатын сапар – біз үшін үлкен құнды дүние болмақ. Республикада алғаш рет «Айғақ» телеарнасымен бастау алған жобаны көрермендер тағатсыздана күтетін боламыз.
Мұхтар СЕРІКБАЕВ, «Айғақ» телеарнасының директоры:
Жаңа жобамыз іске асқалы жатыр. Бұл өткен тарихымызды қозғап, өскелең ұрпаққа үлгі өнеге болар маңызды іс. Жол жүргелі жатқан экспедициялық топқа «Ақ жол» дейміз!
