«Бізге инженерлер мен дәрігерлер ғана емес, қазіргі заманды және болашақты терең түсінетін білікті гуманитарлық сала мамандары ауадай қажет». Елбасы Нұрсұлтан Назарбаев бұдан тура бір жыл бұрын «Болашаққа бағдар: рухани жаңғыру» атты мақаласында осылай деп әлемдік деңгейдегі үздік 100 оқулықты қазақ тіліне аударуды тапсырған болатын. Бүгін Астанада аталған құнды мұралардың алғашқы аударма нұсқасы көпшілік назарына ұсынылуда. Қазақша енді жарық көретін жаңа жүздіктің таныстырылымы тап қазір елордадағы «Назарбаев орталығында» өтіп жатыр. Бұлар – гуманитарлық білімнің барлық бағыты бойынша әлемдегі ең үздік университеттер пайдаланатын озық оқулықтар. «Рухани жаңғыру» бағдарламасы аясында күні бүгінге дейін осындай 18 кітап аударылып, қолданысқа дайын тұр. Оның 16-сы – ағылшын, біреуі – француз, енді бірі орыс тілінен тәржімаланған. Аталған еңбектер философия, әлеуметтану, психология, экономика, менеджмент, кәсіпкерлік, дінтану, лингвистика, мәдениеттану, антропология мен журналистика пәндерін қамтиды. Енді заман талабына сай тағы отызы биыл мемлекеттік тілде басылып шықпақ. Аударылған оқулықтар жаңа оқу жылынан бастап жоғары білім беру жүйесіне енгізіледі.
Дереккөз: 24.kz, сурет — Abai.kz
