Қазақстан Республикасы Тұңғыш Президент күні қарсаңында «Қазақстан — Қытай» газ құбырының «С» тармағында жаңа компрессорлық станция жұмысын бастады. Инвестициялық жобаны салу мен одан әрі пайдалануды «ҚазТрансГаз» АҚ және «Тrans-Asia Gas Pipeline Co. Ltd» компанияларының бірлескен еншілес кәсіпорны — «Азиялық Газқұбыры» ЖШС іске асырды.
Ұлттық оператор «ҚазТрнсГаз» АҚ магистралдық газ құбырының жаңа компрессорлық станциясын пайдалануға енгізді. Нысан Шардара ауданында орналасқан және бұл жоспарланған 8 станцияның бірі болып табылады. Газ инфрақұрылымының жаңа объектісі газ құбырының «С» тармағының өнімділігін арттыруға және жылына 25 млрд текше метрге дейін газ тасымалдау көлемдерін ұлғайтуға мүмкіндік беріп отыр. «ҚазМұнайГаз» ҰК АҚ-ның газ тасымалдау және маркетингі жөніндегі вице-президенті Қайрат Шәріпбаев — «Қазақстан — Қытай» магистральдық газ құбырының компрессорлық станциясын іске қосу, Қазақстандық газ тасымалдау жүйесін жетілдіруге деген кезекті қадам екенін атап өтті. Нысанның іске қосылуымен еліміз шығыстық газ транзитін екі есеге арттыруға қол жеткізді. Бұл Мемлекет басшысының тапсырмасын орындаудағы жүйелі жұмыстардың бірі.
Компрессорлық станция төрт бірдей мемлекетті яғни, Түркіменстан, Өзбекстан, Қазақстан және Қытайды байланыстыратын, өткізу қабілеттілігі мен ұзындығы бойынша ең ірі, сондай-ақ «Орталық Азия-Қытай» трансұлттық газ құбырының құрамдас бөлігі болып табылады. Станцияда «Rolls Royce» компаниясының газ айдаушы агрегаттары орнатылған. Пайдаланылған инновациялық жабдықтар жетекші, әлемдік өндірушілердің замануи үлгісі болып табылады.
«Қазақстан — Қытай» магистралдық газ құбырының жаңа компрессорлық станциясы тәулік бойы және 7 күндік режимде үздіксіз тасымалдау процесінің барынша тиімділігін қамтамасыз ете алады. ҚР Тұңғыш Президент күні қарсаңында жүзеге асқан ірі жобаны мемлекеттің мүддесі үшін жасалынған нақты қадамдардың бірі деп айтуға болады.
Жомарт Бегімбет
