ОҚО –сы Республикада халық саны бойынша бірінші орында. Яғни 2017 жылдың 1 қазанына дейінгі көрсеткіш бойынша өңір халқының саны 2 млн 914 мың 54 адамға жеткен. Сонымен бірге бала тылуы мен табиғи өсім көрсеткіштері бойынша да облысымыз көш басында келеді. Осы және өзге де әлеуметтік-экономикалық көрсеткіштер барысын ОҚО Статистика департаментінің басшысы Айдар Әбілдабеков арнайы баспасөз жиынында жан-жақты мәлімдеді.
2017 жылдың 10 айындағы ОҚО-ның әлеуметтік-экономикалық даму көрсеткіштеріне тоқталған статистика департаментінің басшысы Айдар Әбілдабеков демографиялық өсім бойынша өткен жылдың тиісті кезеңімен салыстырғанда халық саны 34 мың 23 адамға артып, ағымдағы жылдың 1 қазанына дейінгі көрсеткіш бойынша өңір тұрғындарының саны 2 млн 914 мың 54 адамға жеткендігін мәлімдеді. Осылайша республикада халық саны бойынша бірінші орыннан көрініп отырған облысымыз бала туылу саны жөнінен де 9 айдың қорытындысымен алдыңғы қатарда келеді. Есесіне ОҚО да некеге тұру көрсеткіші өткен жылдың тиісті кезеңімен салыстырғанда 9,4 пайызға төмендеп, ажырасу дерегі 1,1 пайызға артып отыр екен.
Халықтың тұрмыс денгейі бойынша 2017 жылдың II тоқсанында халықтың орташа бір айда жан басына шаққандағы атаулы ақшалай табыстары бағалау бойынша 45 мың 530 тенгені құрап, 2016 жылдың тиісті кезеңімен салыстырғанда 4,3 пайызға өскен. Мұнан өзге облыс бойынша жұмыссыздық денгейі 5,3 пайызды құрап отыр. Яғни жұмыссыз азаматтар саны аймақта 62 мыңнан асады . Ал облыстағы нарық көрсеткіштері бойынша азық-түлік тауарларының бағасы 4,3 пайызға, азық-түлік емес тауарлар 8,6 пайызға, мұнан өзге халыққа көрсетілетін ақылы қызметтер тарифі 5,8 пайызға көтерілген. Сондай-ақ 2017 жылдың 1 жартыжылдығында ОҚО жалпы өңірлік өнім көлемі бойынша Республикада 5 — орыннан көрінсе ауыл шаруашылығы саласының үлесі бойынша екінші орынға ие.
Статистикалық көрсеткіштер бойынша экономиканың нақты секторында ОҚО-сы Республикадағы өнеркәсіп өнімінің көлеміндегі үлесі бойынша 8-ші орынды ал өсу қарқыны бойынша 11-ші орынды алып отыр. Осы және өзге де мәліметтерді баяндаған департамент басшысының баяндамасынан соң БАҚ өкілдері тарапынан бірқатар сауалдар қойылды.
2017 жылдың 10 айында облыс бойынша пайдалануға берілген тұрғын үйдің жалпы алаңы 526 мың шаршы метрді құраса, пайдалануға берілген тұрғын үйлер көлемі 2016 жылдың сәйкес кезеңімен салыстырғанда 20,9 пайызға артқан.
Абай Омар
