Өнеркәсіптегі өсімнің негізгі қозғаушы күші өңдеу өнеркәсібі болды. Бұл туралы ҚР Үкіметінің баспасөз орталығында өткен брифингте ҚР инвестициялар және даму бірінші вице-министрі Алик Айдарбаев –айтты деп хабарлайды премьер-министрдің баспасөз қызметі.
Спикер айтып өткендей, алғашқы 7 айдың қорытындысы бойынша өңдеу өнеркәсібі кәсіпорындардағы өндірістің нақты өсімі 2016 жылғы қаңтар-шілдеге 6,3% құрады. Өңдеу өнеркәсібі экспортының көлемі 2017 жылғы қаңтар-мамырда өткен кезеңмен салыстырғанда 27,8% артып, $6,2 млрд құрады.
«Индустрияландырудың екінші бесжылдығын (2015-2016 жж.) іске асырғалы бері шамамен 1,7 трлн теңге сомаға 258 жоба енгізілді, 21 мың тұрақты жұмыс орны құрылды, оның ішінде 2017 жылдың басынан бері 3,9 мың жұмыс орнын құрумен 489,8 млрд теңге сомаға 32 жоба енгізілді», – деді А. Айдарбаев.
Жалпы индустрияландыру бағдарламасын іске асырған жылдары 5,1 трлн теңге сомаға 1 060 жоба енгізілді, 100,2 мыңнан астам тұрақты жұмыс орны құрылды.
Жылдың соңына дейін 10 мың тұрақты жұмыс орнын құрумен 1 трлн теңгеге жуық сомаға 100-ден астам жобаны енгізу жоспарланған.
Алик Айдарбаев атап өткендей, 40 жоба шетел инвесторларының қатысуымен жүзеге асырылады. Жобалардың ішінен ол «Проммашкомплект» ЖШС, «Giessenhaus» ЖШС, «Мареван фуд» ЖШС ерекше атап өтті.
Сонымен қатар, Индустрияландыру картасының жобаларынан бөлек жалпы 280 млрд теңге сомаға арнайы экономикалық және индустриялық аймақтардағы 100-ден астам жобаны жүзеге асыру, сондай-ақ 6800 адамды жаңа жұмыс орындарымен қамтамасыз ету жоспарланған.
«2017 жыл экспорттың ұлғаюына және өндіріс көлемінің өсіміне бастамашы болды, осылайша Қазақстанның үшінші жаңғыруына технологиялық және экономикалық берік іргетас қаланды», – деп түйіндеді А. Айдарбаев.
