І жартыжылдық қорытындысы бойынша Қазақстанда 65 медициналық мекеменің ішінде 12 медициналық мекеме ұлттық аккредитациялау стандарттарына сәйкестілігіне кешенді бағалаудан өте алмады, деп хабарлады Денсаулық сақтауды дамыту республикалық орталығынан (ДСДРО).
Қазақстанда 2017 жылдың бірінші жарты жылдығының қорытындысы бойынша медициналық ұйымдарды аккредитациялау аяқталды. Ағымдағы жылдың бірінші жарты жылдығында 14 аймақтан (Қызылорда және Шығыс Қазақстан облыстарынан басқа) алғашқы медициналық-санитарлық және стационарлық көмек көрсететін 65 медициналық ұйым, сондай-ақ аудандық және ауылдық деңгейдегі медициналық мекемелер ерікті түрде аккредитациядан өтуге өтінім берген. Жалпы, өтінім берген ұйымдардың 49-ы (75%) – мемлекеттік, 16-сы (25%) – жекеменшік медициналық ұйымдар. Аккредитациядан өтуге көбіне Жамбыл (12 МҰ, барлық өтінімдердің 18,46% құрады), Қарағанды (8 МҰ — 12,31%) және Алматы (7 МҰ – 10,77%) облыстарының медициналық ұйымдарынан (одан әрі — МҰ) өтінімдер түсті.
Қазақстан Республикасы Денсаулық сақтау министрлігінің Қоғамдық денсаулық сақтау комитетінің (одан әрі — ҚДСК) 2017 жылғы 23 мамырдағы №38-ОД «2017 жылы медициналық ұйымдарды аккредитациядан өткізу туралы» бұйрығына сәйкес, медициналық ұйымдарға сыртқы кешенді бағалау жүргізу үшін, құрамына 31 оқыған сарапшы, ҚР ДСМ ҚДСК 1 қызметкері, ҚР ДСМ ҚДСК аумақтық департаменттерінің 14 қызметкері, топтардың жетекшілері ретінде Аккредитациялау орталығының 2 қызметкері кіретін 16 сараптау тобы жасақталды.
Медициналық ұйымдардың аккредитация стандарттарына сәйкестілігін сараптамалық бағалау Қазақстан Республикасының Денсаулық сақтау және әлеуметтік даму министрінің 2015 жылғы 10 наурыздағы №127 «Денсаулық сақтау саласындағы аккредитациялау ережелерін бекіту туралы» бұйрығына сәйкес, 2017 жылдың 29 мамыры мен 24 маусымы аралығында тоғыспалы тәсілмен өткізілді.
ҚазТАГ