Астанадағы ОКҚ-де «SarapТaim» сарапшылар клубының «Қазақстандағы 100 жаңа есім – жетістіктер тарихы» атты пікірталас отырысы өтті, деп хабарлайды BAQ.kz тілшісі.
18 млн қазақтан 100 жаңа есімді анықтау оңайға соғар емес. Қазіргінің өзінде мыңнан астам өтініш келіп түскен.
«SarapTime»-ның бүгінгі сарапшыларының қатарында «Қазконтент» АҚ Басқарма төрағасы Евгений Кочетов, «Бюро 100» бастамашыл тобының мүшесі Махаббат Есен, «Қоғамдық келісім» РММ баспасөз қызметінің басшысы Қымбат Досжан, Қазақстан КВН Одағының төрағасы Есен Елеукен, сондай-ақ, сарапшылар мен журналистік қауымдастықтар, үкіметтік емес ұйымдар, ғалымдар, қоғамдық пікір мен азаматтық қоғам көшбасшылары, танымал блогерлер қатысты.
Ақпарат және коммуникациялар министрлігі ОКҚ директоры Артур Нығметов отырысты аша отырып, «Қазақстандағы 100 жаңа есім» жобасы Тәуелсіздік жылдарында жетістікке жеткен әртүрлі өңірлердегі, түрлі жастағы және ұлты әртүрлі 100 нақты адамның тарихы екенін атап өтті.
Сондай-ақ, ол 100esim.el.kz сайтының іске қосылғандығын хабарлады.
Енді тілек білдірушілердің әрқайсысы жобаға енгізу үшін өзі немесе өзінің таныстары туралы ақпаратты жолдауына болады.
«Қазақстандағы 100 жаңа есім» жобасына бүгінгі таңда әртүрлі жастағы түрлі мамандық иелерінен 1000-нан астам ұсыныс түскен.
Евгений Кочетов жиналғандарға өтінімдерді беру тәртібін түсіндірді. Өтінімді іріктеудің негізгі өлшемдері — Тәуелсіз Қазақстанның дамуына тұлғаның нақты қосқан үлесі болмақ.
«100 жаңа есім» жобасы арқылы өзіміз танымайтын адамдарды біліп жатырмыз. Жалғыз Қазақстаннан емес шетелден де өтініштер келіп түсіп жатыр. Мәселен, жақында Берлиндегі қазақтардан ұсыныс келіп түсті. Көпшілік маңызды жобаға назарын бұрса деген тілек білдіргіміз келеді», — дейді Евгений Кочетов.
Осы орайда, 100 жаңа есімге кімдер қатысуы керек екендігін талқылаған қоғам белсенділері бұл жобаның әлі де нақты талаптары мен ұстанымдарын айқын белгілеу керектігіне тоқталды.
«Әрбір тұлғаның, 100 жаңа есімге ұсынылған қайраткерлердің екі жағы барын ұмытпайық. Мысалы біз бүгінгі күннің батыры ретінде таныған азаматтардың, қоғамға, келер ұрпаққа үлгі болар қандай ерліктері барын, қандай қызметтері барын нақтылай түсуіміз керек. Көршісінің үш баласын өрттен құтқарған азаматты 100 есімнің бірі ретінде қосқанымызбен, оның қалған өмірі қалай өрбіп жатқанынан хабарымыз болмаса, оны қалай 100 есімнің қатарына қоса аламыз? Немесе, Қазақстан атын әлемнің өзге түкпірінде ұлықтап жүрген азаматтарымыз бар. Оларды Қазақстанда тұрмайды деп, 100 есімге кіргізбей тастауға бола ма? Міне осындай мәселелердің басын ашып алған орынды» — дейді «Қоғамдық келісім» РММ баспасөз қызметінің басшысы Қымбат Досжан.
Пікірталас қатысушылары 100 жаңа есімге жерлестік, рушылдық немесе таныстық емес, керісінше елге мақтаныш, ұрпаққа үлгі болар азаматтардың кіруін қадағалау керектігін сөз етті.
Сонымен бірге, «Қазақстанның 100 жаңа есімі» жобасына шеттегі қандастарымыздың да кіру-кірмеуі туралы сөз болды. Дегенмен бұл алдағы уақытта арнайы талқылауды қажет ететін мәселе екені айтылды. Себебі мұнда «Қазақстанның 100 жаңа есімі» деп анық жазылған.
Ал естеріңізде болса, осыдан біраз бұрын BAQ.kz тілшісіне берген сұқбатында Дүниежүзі қазақтары қауымдастығының бұрынғы басшысы Талғат Мамашев «Дүниежүзі қазақтарының 100 жаңа есімін» анықтауды бастағандарын жеткізген болатын.
Дереккөз: Baq.kz
