Шымкенттік мұғалімдер жұмысқа электронды түрде қабылданып жатыр. Білім бөліміндегілер ақпаратты технологиялар дамыған заманда озық әдістерді пайдаланып, жұмыстары жеңілдеп қалған, деп хабарлайды ҚазАқпарат ХАА тілшісі.
Білім беру саласына енгізілген тың жаңалық қала әкімінің ұйытқы болуымен қолға алынған. Қазір миллионға тарта тұрғыны бар қалада ұстаздар тек электронды түрде жұмыс табуда. Олар бұрынғыдай құжаттарын қолтықтап, әр мектепке бармастан-ақ үйінде отырып-ақ орналасатын болған. Себебі, «Жұмыспен қамту туралы» Заң бойынша әрбір мекеме өздеріндегі бос жұмыс орындары туралы мәліметті үш күн ішінде сайтқа салуы керек.
«Мекеме бос орын жариялаған соң, сайтқа мамандығы сәйкес келетін тұлға құжаттарын электронды түрде жібереді. Сайтта қандай құжаттар сұрағанын суретке түсіріп немесе сканерлеп электронды түрде жолдайды. Ұялы телефон нөмірін көрсетеді. Сол ұялы телефонына смс хабарлама келіп түседі», — дейді Шымкент қалалық білім бөлімінің бас маманы Қасымхан Досжанов.
Құжаттар тапсырылған соң қоғамдық ұйымдар мен білім бөлімінің қызметкерлерінен құрылған арнайы комиссия үміткермен сұхбаттасу жүргізеді. Әңгімелесу барысында мұғалімнің адами қасиеттеріне баға беріледі. Сөйтіп, қиындықсыз жұмысқа тұрудың мүмкіндігі туады. Бұл күнде бала саны көптеп тіркелген шаһарда мұғалімдерге бос жұмыс орындары жетерлік екен.
«Бізде бүгінде орыс сыныптарына сабақ беретін пән мұғалімдеріне сұраныс жоғары деп айтуға болады. Орыс тілді бастауыш сыныптарға бүгінде 210 мұғалім керек. Басқа да химия, биология, математика бойынша орыс сыныптарына мұғалім болам деушілер болса, бүгінгі күні орын өте көп», -дейді Шымкент қалалық білім бөлімінің басшысы Жанат Тәжиева.
Өз кезегінде жаңа тәсіл жас мамандар үшін қандай бос орындар бар екенін көрсететін ақпарат алаңы саналып отыр. Ең бастысы — ашық, анық және адами фактор жоқ.
Дереккөз: inform.kz
