Астанада Германия федералды президенті Франк-Вальтер Штайнмайердің Қазақстанға ресми сапары аясында Қазақстан-Германия іскерлік кеңесінің 10-шы отырысы өтті. Шара барысында қос тарап құны 973 млн еуро болатын 20 келісімге қол қойды, деп хабарлайды Baq.kz тілшісі.
Маңызды жиынға «Бәйтерек» Ұлттық басқарушы холдингі басқармасының төрағасы Ерболат Досаев, Германия федералды президенті Франк-Вальтер Штайнмайер, Дойче банктің басқарушы директоры Питер Тильс, ҚР Инвестициялар және даму министрі Жеңіс Қасымбек, ҚР Энергетика министрі Қанат Бозымбаев қатысты.
Іскерлік кеңес отырысда ҚР Инвестициялар және даму министрлігі мен немістің DENA энергетикалық агенттігімен энергия үнемділік саласында өзара ынтымақтастық орнату, Қазақстан мен Германияның машина жасау одағымен машина жасау саласында өзара әрекеттестік және ынтымақтастық орнату, ҚР ИДМ Инвестиция комитеті мен «Asadel International B.V» компаниясымен өзара ынтымақтастық орнату, ҚР ИДМ Инвестиция комитеті мен «Heildelbergcement» компаниясы арасында өзара ынтымақтастық орнату меморандумдарына, Қазақстандағы Linde Group компаниясының қызметіне қолдау көрсету мақсатында «Kazakh Invest» АҚ мен Linde Group арасындағы өзара ынтымақтастық туралы шектелмелі келісімге, «ArcelorMittal Temirtau» АҚ мен Linde Group компаниясы арасында өндірістік газбен жабдықтау туралы келісімге, әрі «HILL» ЖШС (ОҚО) мен Linde Group компаниясы арасында сутекпен жабдықтау туралы алдын ала келісімге, «Қазақстанның индустрияны дамыту институты» АҚ мен Автоматизациялау және өндірісті жедел басқару жөніндегі Фраунгофер институты Industry 4.0 саласында өзара ынтымақтастық орнату, Оқ-дәрілерді кәдеге жарату сұрақтары бойынша әрі Қазақстанда оқ-дәрілерді кәдеге жарататын орталық құру жөнінде ниет туралы шартына, Жамбыл облысында «Күйдіргіш сода мен хлор дайындау» жобасын жүзеге асыру туралы келісімге, Қазақстанның баламалы энергетика қауымдастығы мен Германияның күн энергиясы қауымдастығы (BSW-Solar) арасында өзара ынтымақтастық орнату, әрі халықаралық «Қазақпарат» агенттігі мен немістің DPA ақпарат агенттігін арасында өзара түсіністік және ынтымақтастық орнату меморандумына қол қойылды.
Сонымен қатар жиында «Самұрық-Энерго» АҚ және Wind Power GmbH компаниясы арасында Алматы облысында күн энергостанциясын салу меморандумына, «Казводхоз» РМК мен «Wind Power GmbH» компаниясы арасында Оңтүстік Қазақстан облысының Өгем өзенінде су электр станциясының салу туралы меморандумына, «Промондис Қазақстан» ЖШС және NwComp Solar GmbH компаниясы арасында Оңтүстік Қазақстан облысының Отырар ауданында қуаттылығы 25 МВт болатын күн электр станциясының құрылысы туралы келісімге, «Промондис Қазақстан» ЖШС және NwComp Solar GmbH компаниясы арасында Алматы облысының Жамбыл ауданында қуаттылығы 25 МВт болатын күн электр станциясының құрылысы туралы келісімге, «KaDi» компаниясы» ЖШС және NwComp Solar GmbH компаниясы арасында Оңтүстік Қазақстан облысының Жетісай ауданында қуаттылығы 5 МВт күн энергиясы паркін салу туралы келісімге қол қойылды.
Сонымен қатар кеңесте «Қазгеология» АҚ және «ULMUS Kazakhstan» ЖШС арасында геологиялық барлау саласындағы ынтымақтастықты кеңейту туралы келісімге, «Технологиялық даму жөніндегі ұлттық агенттік» АҚ және Мюнхен технологиялық университетінің еншілес ұйымы «TUM International» арасында «МТУ өндірістік-білім беру және инновациялық орталығын» және «Кешенді оқыту орталығын» құру бойынша ынтымақтастық туралы меморандумына, «Агротехнологияларды трансферттеу мен коммерцияландыру орталығы» ЖШС және Bosch&Schorle GmbH компаниясы арасындағы ынтымақтастық туралы шекті келісімге шарт жасалды.
Осы орайда «Технологиялық даму жөніндегі ұлттық агенттік» АҚ басқарма төрағасы Марат Омаров германиялық тараппен жасалған келісімнің маңыздылығына тоқталды.
«Бүгін біз Еуропадағы ең көне техникалық университеттердің бірі — Мюнхен техникалық университетімен келісімге қол қойдық. Бұл Қазақстан мен Германия арасындағы бірлескен инновациялық орталық құру туралы келісім. Мұнда біз демеуші тарап ретінде қатысып отырмыз. Біз үшін Президент жолдауы аясындағы «Индустрия 4.0» бойынша адам капиталы басты фактор болып саналады. Бұл келісім бізге «Индустрия 4.0» бағдарламасын жүзеге асыру үшін білікті кадрларды дайындауға мүмкіндік береді», — деді ол.
Марат Омаровтың айтуынша, жобаның құны 5 жылға 15 млн долларды құрайды. Жоба бойынша Назарбаев университеті мен Қазақ-Британ техникалық университетінің қызметкерлері білімдерін жетілдіреді.
«Бұл алаңда қосарлы оқыту тәсілі қолданылады. Мұнда қызметкерлерге оқу мен тәжірибе жинақтау мүмкіндіктері беріледі. Әзірге бірлескен инновациялық орталық құруды ғана талқылап жатырмыз. Біздің тарапымыздан қаржыландыру, ал немістерден беру модульдері, тренингтер, тәжірибелік семинарлар және т.б. шаралар қарастырылған. Жоба аясында алдағы жылы 250 адамды оқытуды жоспарлап отырмыз», — деп түйіндеді сөзін төраға.
Айта кетейік, елордада өткен Қазақстан-Германия іскерлік кеңесінің 10-шы отырысында құны 973 млн еуро болатын 20 келісімге қол қойылды. Кеңеске жалпы 130 өкіл қатысты. Оның 50 делегаты неміс тарапынан болса, 80-нен астамы Қазақстан тарапынан.
