Бүгін Оңтүстік Қазақстан облысының әкімі Жансейіт Түймебаев өңірге арнайы жұмыс сапарымен келген ҚР Денсаулық сақтау вице-министрі Алексей Цоймен кездесті. Міндетті әлеуметтік медициналық сақтандыруды енгізу мәселелері бойынша өңірлерде ақпараттық-түсіндіру жұмысын жүргізу мақсатымен келген министрдің орынбасарына аймақ басшысы алғысын білдіріп, салада атқарылып жатқан жұмыстар жайын талқылады.
Отырыста А.Цой өңір басшысына күнгейдегі медициналық сақтандыру ісінің жай-жапсары туралы хабарлап, республика бойынша жүргізіліп жатқан ауруханалар мен емханаларды біріктіру туралы жұмыстардың Оңтүстік Қазақстан облысында кешеуілдеп жатқанын жеткізді.
Өз кезегінде, Ж.Қансейітұлы аталған кемшіліктерді түзеу бойынша тиісті сала жетекшілеріне тапсырма беріп, осы жылдың күз мезгіліне дейін аймақтағы барлық емханаларды шаруашылық жүргізу құқығындағы мекемелерге айналдыруды міндеттеді. Бұл саладағы жұмыстарды оңтайландырып, сапалы медициналық қызмет көрсетуге мүмкіндік береді. Міндетті әлеуметтік сақтандыру жүйесін енгізу бойынша аталған министрлікпен тығыз қарым-қатынаста жұмыс істеуді жүктеген әкім жұмыстарды сапалы әрі мерзімінде жүргізу қажеттігін ескертті.
Облыс әкімімен болған кездесуден соң Денсаулық сақтау вице-министрі А.Цой облыстағы 150-ден астам кәсіпорын басшыларымен кездесіп, сақтандыру жүйесінің мән-маңызын түсіндірді. Жетекшілермен пікір алмасып, сұрақтарына жауап берді.
Түс ауа министр орынбасары Шымкенттегі №6 Шымкент қалалық емханасы мен ҚР ДСМ Қоғамдық денсаулық сақтау комитетінің ОҚО бойынша департаментінің, облыстық клиникалық ауруханасының және ҚР ДСМ Медициналық қызметке ақы төлеу комитетінің ОҚО бойынша департаментінің жұмысымен танысады деп күтілуде.
Айта кету керек, Оңтүстікте аталған жүйені енгізу аясындағы ақпараттық-түсіндіру жұмыстары бойынша 775 кездесу жүргізу кезінде 198 мың дана ақпараттық материал таратылып, 17 билборд, 7 стенд ілінді. Сондай-ақ, аудан, қала әкімдіктерімен, медицина ұйымдарының қатысуымен 881 бұқаралық ақпарат құралдары арқылы түсіндіру жұмыстары жүргізілген. Нәтижесінде 2 млн. 584 мың 937 адам өз мәртебесін анықтап, аталған жүйе аясында емханаға тіркелген.
ОҚО әкімінің баспасөз қызметі
