Бүгін ҚР Парламенті Мәжілісінің жалпы отырысында «Прокуратура туралы» заң жобасын қорғаған Бас прокурор Жақып Асанов өз әріптестерінің жүйесіз жұмысын сынға алды, деп хабарлайды Baq.kz тілшісі.
«Бізде жалпы қадағалау бар. Біз бизнесті тексеруіміз керек. Мемлекеттік органдарды тексеруіміз қажет деп соған біз ауысып кеткенбіз. Ал қылмыстық процесс өз бетінше. Ал жырттыққа жамау болып, күшімізді ұсақ-түйекке жұмсаудамыз. Балабақшада бір прокурор температураны тексеріпті. Екінші прокурор асханада қасықты санапты. Үшіншісі мектепке барып, класстың журналына тисіпті. Дұрыс емес қой! Бірақ мен бұл прокурорларды түсінемін. Мен де өзім қалалық прокуратурада істедім. Онда үлкен есеп бар. Есепте графалар көп. Ол графаларды толтырмсаң, көрсеткіш болмаса, ертең облыстық прокуратура сені қатты сынға алады. Жұмысыңнан алып тастауы мүмкін. Сондықтан амал жоқ, бірнәрсе істеу керек. Қимылдау керек. Сосын оларды тексереді. Әйтеуір тырнақтың астынан кір іздейді», — деді ол.
Бас прокурор өзі басшылық ететін ведомство кейбір мемлекеттік органдардың жұмысын қайталап отырғандығанын да жасырмады. Осының салдарынан елімізде жемқорлық деректері жиілеуде дейді ол.
«Көбінесе, біз қаржылық бақылау деген бар ғой. Соның терісін жамылғымыз келеді. Неге? Өйткені, мемлекеттік сатып алулар, тендер соның маңайынан шыққымыз келмейді. Бірақ ондай тексеруден кейін жалпы жағдай пәлендей жақсарып жатыр деп айту қиын. Екіншіден, бізде 60 шақты тексеруші органдар бар. Олардың жұмысын мойнымызға іліп алдық. Оларда соған әбден үйреніп кетті. Түйенің жүгі жеңілдеген сайын жалқау келеді деп. Олар қит етсе бітті, жауапкершіліктен қашып, прокуратураға барамыз дейді. Бізге де ол ыңғайлы. Соны қаласақ, біз тексереміз. Тексергіміз келмесе, басқаларға шығарып саламыз. Оның барлығы жемқорлыққа тура жол», — деді ол.
Сөз соңында Жақып Асанов тұрғындардан өткен жылы 300 мың арыз келгендігін жеткізді. Оның пікірінше, аталмыш заң жобасы халықтың сенімін ақтап, олардың құқығын қорғауға жол ашады.
«Былтырдың өзінде 300 мың арыз түскен екен. Оны қарауда қандай сапа болсын? Әрине, біз арыздан қашпаймыз. Одан біз құтыламыз деген ой жоқ. Керісінше, осыдан бір ай бұрын Бас прокуратурада халықты қабылдайтын арнайы орталық аштық. Онда адамдардың тіпті сотқа жаза алмай жүрген арыздарын қабылдадық. Олардың адвокатқа ақшасы жоқ. Олардың қызметі қымбат тұрады. Біз олардың арыздарын жазып беріп отырмыз. Сондықтан аталмыш заң жобасының негізгі мақсаты халықтың сенімін ақтау», — деді Жақып Асанов.
Дереккөз: Baq.kz
