Мемлекет басшысы «Болашаққа бағдар: рухани жаңғыру» мақаласы арқылы қоғамның даму тетiктерiн дөп басып, халқымыздың руханиятына терең мән бере отырып, айқын да жасампаз идеяларын ұсынды.
Қашан да рухы мықты елдiң еңсесi биiк болатыны анық. «Адамзат баласының алдында үш айғақты зор мiндет тұр: бiрi — бейбiтшiлiктi, екiншiсi — руханиятты, үшiншiсi — табиғатты қорғау һәм сақтап қалу. Бұлардың қай-қайсысы да бiздiң тiршiлiгiмiздiң басты бағдары. Бiр-бiрiн толықтыратын ұғымдар» деген Елбасының идеясын басты бағыт етiп ұстанып, тiршiлiгiмiздiң өзегiне айналдыру айқын мұратымыз. Президент «жаңғыру жолында бабаларымыздан мирас болып, қанымызға сiңген, бүгiнде тамырымызда бүлкiлдеп жатқан iзгi қасиеттердi түлетуiмiз керектiгiн» ескерте отырып, кертартпа әдеттерден, ысырапшылдық пен даңғойлық, астамшылық секiлдi жағымсыз қылықтардан арылмайынша, берекемiздiң кiрмейтiнiн нықтап айтады. Ал, қанағатшылдық пен қарапайымдылық, ұстамдылық пен үнемшiлдiк көсегемiздi көгертiп, көргендiлiгiмiздi танытпақ. Осы тұста Ұлы Абайдың тiзбелей айтып кеткен 5 дұшпаны мен 5 асыл iсi жадымызда жаңғырып, осынау маңызды мақаламен үндестiк тауып жатқанын бағамдаймыз.
Тәуелсiз ел тiрегi – бiлiмдi ұрпақ десек, жаңа дәуiрдiң күн тәртiбiнде тұрған мәселесi – бiлiм беру саласындағы реформаларды ойдағыдай жүзеге асырып, ғылымды дамыту. Өркениет көшiне iлестiретiн – бiлiм-ғылым, рухани мәдениетiмiз бен терең тағлым. «Табысты болудың ең iргелi, басты факторы бiлiм екенiн әркiм терең түсiнуi керек. Құндылықтар жүйесiнде бiлiмдi бәрiнен биiк қоятын ұлт қана табысқа жетедi» деген тұжырымы арқылы Елбасы зиялы қауымға, ұстаздарға ауқымды мiндет, зор жауапкершiлiк жүктейдi. Ел ертеңi жаңа технологияларды меңгерген, заман талабына лайықты, бiлiмдi жастардың қолында екенi ақиқат.
Ұлт Көшбасшысы: «Ел болу үшiн – ұлттық рух, ұлттық қасиет және ұлтқа деген сенiм болуы керек» дейдi. Ұлттық кодымызға бекем болайық, ұлттық рухымызды аласартпайық. Иә, рухы биiк елдiң – мәртебесi асқақ, iргесi берiк. Негiзгi ұстанымымыз да, елдiк ұстынымыз да осы екенiн естен шығармауға тиiспiз.
Нұрбол ТҰРАШБЕКОВ, Түлкiбас ауданының әкiмi.
Дереккөз: okg.kz
