Түркістан қаласында Түркі әлемі әдебиетінің кітап көрмесі мен ақын-жазушыларының дөңгелек үстелі өтті. Шараға Оңтүстік Қазақстан облысының әкімі Жансейіт Түймебаев, ТҮРКСОЙ ұйымының Бас хатшысы Дүйсен Қасейінов, Түркия, Қырғызстан, Түркіменстан, Өзбекстан, Әзербайжан, Татарстан, Қазақстанның Астана, Алматы қалаларының және өңіріміздің көрнекті қаламгерлері қатысты.
Бүгінгі бас қосу түбі бір түркітілдес елдердің өзара ынтымақтастық, достық қарым-қатынасын нығайтып, бауырлас елдердің ақын-жазушыларының шығармашылық байланысын дамыту мақсатында ұйымдастырылды. Кездесуде жазушылар түркітілдес елдердің, оның ішінде қазақ әдебиетін насихаттау жайы мен кешегі Елбасымыздың «Болашаққа бағдар: рухани жаңғыру» мақаласы аясында пікір алмасты.
Жиында сөз алған облыс әкімі Жансейіт Түймебаев Мемлекет басшысының «Болашаққа бағдар: рухани жаңғыру» атты айрықша, бағдарламалық мақаласының маңыздылығына тоқталып, алдағы ортақ мақсат — міндеттерді сөз етті.
«Жалауын жоғары ұстап, намысын ешкімге таптатпаған ежелгі түрік халықтарының бүгінгі ұрпақтары бір-бірімен рухани туыстық қарым-қатынасы әрқашан да жоғары бола береді. Сіздерге түркі елдерінің салт-дәстүрлерін, рухани мәдениетін дамыту жолында атқарып жатқан еңбектеріңіз үшін алғысым шексіз!», — деді әкім.
Басқосуда ТҮРКСОЙ ұйымының Бас хатшысы Дүйсен Қасейінов жазушы, Қырғыз Республикасы мәдениетіне еңбегі сіңген қайраткер Кален Сыдықов, жазушы, Әзірбайжан республикасының қаламгері Захид Халиловтар шығармашылық байланыстарды нығайта түсу мәселесін көтерді.
Аталған шара аясында Түркітілдес елдердің әдебиетін, мәдениетін насихаттау мақсатында Түркістандағы ОҚО Тарихи мәдени этнографиялық орталығында «Түркі әлемі: әдеби –мәдени дәстүр» атты түркітілдес елдер қаламгерлері шығармаларының кітап көрмесі ашылды.
Шара соңында облыс әкімі бірқатар зиялы қауым өкіліне облыстың 85 жылдығына орай Алғыс хат табыс етіп, иықтарына шапан жапты. Одан бөлек, жазушы Еркінбек Тұрысов, Зәкір Асабаев бастаған 10 ақын-жазушыға ТҮРКСОЙ ұйымының мадальдары мен Құрмет грамоталары табыс етілді.
ТҮРКСОЙ ұйымы тарапынан марапатталатын ақын-жазушылар тізімі
1.ТҮРКСОЙ халықаралық ұйымының медальдарымен марапатталады:
- Еркінбек Тұрысов – 90 жас – Халдун Танер атындағы медаль
- Зәкір Асабаев – 80 жас – Халдун Танер атындағы медаль
- Аян Нысаналы – 75 жас – Мақтұмқұлы атындағы медаль
- Дулат Исабеков – 75 жас – Жүсіп Баласағұн атындағы медаль
- Мұхтар Шаханов — 75 жас – Жүсіп Баласағұн атындағы медаль
- Смағұл Елубай – 70 жас — Жүсіп Баласағұн атындағы медаль
- Иранбек Оразбаев – 70 жас – Мақтұмқұлы атындағы медаль
- Нұрлан Оразалин — 70 жас – ТҮРКСОЙ «Құрмет» алтын медалі
- Захид Халил (Әзірбайжан) – 75 жас — Халдун Танер атындағы медаль
- Кален Сыдықова (Қырғызстан) – 60 жас — Халдун Танер атындағы медаль
2.ТҮРКСОЙ халықаралық ұйымының Құрмет грамоталарымен марапатталады:
- Елтай Бимағанбетұлы – 85 жас
- Сатыбалды Қосалы -75 жас
- Күлзипа Палымбетова – 75 жас
- Жарылқасын Боранбаев– 70 жас
- Хавозмат Қошқаров – 70 жас
- Аманбек Ақайұлы– 70 жас
- Сабырбек Олжабай – 60 жас
- Әлібек Файзуллаұлы — 60 жас
- Мұхтар Шерім — 60 жаста
- Смайыл Ыбырақұлы – 60 жас
ОҚО әкімінің баспасөз қызметі
