«Қазақстанның Даму Банкі» АҚ шикізаттық емес экономикадағы жобаларды қаржыландыруды жандандыру мақсатында өзінің несие саясатына Өзгерістерді енгізді. Бұл туралы ҚДБ басқарма төрағасы Болат Жәмішев мәлімдеді.
«2016 жылы қазанда бекітілген ҚДБ несие саясаты туралы меморандумның жаңа редакциясына сәйкес банк инвестициялық жобаларды қаржыландыру «шегін» 30 млн АҚШ долларынан 7 млрд теңгеге дейін, тамақ өнеркәсібі үшін 10 млн АҚШ долларынан 3 млрд теңгеге дейін, экспорттық операциялар үшін 5 млн АҚШ долларынан 1 млрд теңгеге дейін төмендетті. Ақпараттық ашықтықты арттыру мақсатында банк ҚДБ әкімшілендіру және қаржыландыруындағы жобалар туралы жалпыға қолжетімді ақпарат базасын кеңейтті. Банктің сайтында қаржыландырудың негізгі шарттары туралы ақпаратпен және жобалар бойынша жалпы мәліметпен танысуға болады. «Бәйтерек» холдингінің негізі қаланғалы бері соңғы төрт жыл бойы ҚДБ өңдеу өнеркәсібі мен өнеркәсіптік инфрақұрылым жобаларын несиелеу динамикасы бойынша оң үрдісті сақтап келеді. Несие қоржыны 2016 жылдың қорытындысы бойынша 2013 жылдың көрсеткішімен салыстырғанда 4 есеге артты және 1,6 трлн астам теңгені құрады, ал оның активтердегі үлесі 2016 жылғы 37,3%-дан 2016 жылдың қорытындысы бойынша 65,5%-ға дейін ұлғайды. Соңғы 4 жылда ҚДБ активтері шамамен 2,5 есеге өсті, бұл кезең толығымен банк үшін шығынсыз болды. 2016 жылдың қорытындысы бойынша жалпы 225 млрд теңге қарыздар сомасына 19 жоба қаржыландыруға мақұлданды. Жобалар мен бағдарламаларды қаржыландырудың жалпы көлемі 2016 жылы 426 млрд теңгені құрады, бұл рекордтық көрсеткіш болып табылады (өсім 2015 жылдың деңгейіне 30%-ды құрады). Есептік кезеңде тікелей несиелеу аясында Даму банкі жалпы 277,5 млрд теңге сомаға шикізаттық емес сектор кәсіпорындарының 14 инвестициялық жобасы мен 10 экспорттық операциясын қаржыландырды, бұл ЕДБ-нің экономиканың шикізаттық емес сектор кәсіпорындарын несиелеуге бір жылда берген ұзақ мерзімді қарыздарының көлемімен салыстырғанда 57%-ды құрайды. Өз кезегінде ағымдағы жылдың төрт айының қорытындысы бойынша ҚДБ қаржыландыруға жалпы 346 млрд теңге қарыздар сомасына 6 жобаны мақұлдады, олардың ішінде Шымкент МӨЗ-ін жаңғырту және жөндеу, сондай-ақ, Астана халықаралық әуежайының жолаушылар терминалын жөндеу сияқты маңызды жобалар бар. Бұдан өзге, банктік сараптама кезеңінде тамақ өнеркәсібі және мұнай өңдеу сияқты салаларда 2 жоба бар», деді ол.
Төрағаның сөзінше, ағымдағы жылдың алғашқы 4 айында жалпы 102,5 млрд теңге сомаға 7 инвестициялық жоба мен 6 экспорттық операция қаржыландырылған.
Дереккөз: Egemen.kz