Бүгінгі таңда, Қазақстанда кеңінен қолданылатын мың жарымға жуық дәрілік өсімдіктер кездеседі. Олардың көбісі медицинада, ауылшаруашылығында және өнеркәсіпте қолданылады. Алайда, прокурорлардың айтуынша мемлекеттік органдардың және қоғамның назарын аударатын, шешімі табылмаған мәселелер жоқ емес. Орман қоры және ерекше қорғалатын табиғи аумақтардан тыс орналасқан жерлерде дәрілік флораларды жинау осы күнге дейін заңмен реттелмеген. Осылайша, өзекті проблема туындап отыр. Олардың ішінде мия тамырын бақылаусыз жинау басты мәселенің бірі.
Бұл өсімдік елімізден жыл сайын үлкен көлемде шет елдерге шығарылады. Мия тамырын жинайтындар пайда табу мақсатында оның ерекешелігі мен технологиясын ескермейді. Салдарынан өсімдіктің жойылып кету қаупі бар. Сондай-ақ, бұл мәселеден жануарлар әлемі зардап шегіп, тың жерлер бүлінуі мүмкін. Дегенмен, прокурорлар бұл өсімдіктің пайдалануына шектеу қоюды мақсат тұтпайды. Керісінше бұл саланы дамытып, дәрілік өсімдіктерге байланысты заңды реттеу қажет деп санайды.
Орын алып жатқан жағдайдың шешімі тек құқық қорғау органдарының міндетінде емес, форумға ҚР Парламенті мәжілісінің депутаттары, жергілікті атқарушы билік өкілдері, облыстық, қалалық мәслихаттың депутаттары мен жеке кәсіпкерлер, ғылыми институттардың мамандары қатысып,белсенділік танытты. Қатысушылар орын алып жатқан жағдайдың шешілуіне қатысты пікірлерін жеткізіп, өзекті мәселеге байланысты өз ұсыныстарымен бөлісті.
Форумның нәтижесі бойынша құжаттарды қарау, орталық мемлекеттік органдарға жолдау шешімі қабылданды. Ұйымдастырушылардың мақсаты — дәрілік өсімдіктерді сақтап қалу және оны дұрыс пайдалана білу. Осы арқылы еліміздің экономикасын дамыту және әлеуметтік жағдайын жақсарту болып отыр.
Жомарт Бегімбет