Шымкентте даңқты бапкер Мардан Сапарбаевты еске алуға арналған XXXII халықаралық турнир өтті. Грек-рим күресінен өткен додаға алты мемлекеттен 250-ге жуық балуан қатысып, он салмақ дәрежесінде өзара мықтыны анықтады. Дәстүрлі турнир даңқты бапкердің есімін ұлықтап, спорттағы сабақтастықты жалғастыруға жол ашады.
Халықаралық турнирдің салтанатты ашылу Мемлекеттік Әнұранымен басталды. Жарысқа Қазақстан, Венгрия, Әзербайжан, Ресей, Тәжікстан, Өзбекстан және Қырғызстаннан келген балуандар он салмақ дәрежесінде бақ сынасты. 32-рет ұйымдастырылып отырған дәстүрлі турнирдің жүлде қоры – 12 миллион теңге. Салтанатты жиынға даңқты бапкердің жұбайы мен ұлы арнайы қатысып, спортшыларға сәттілік тіледі.
Турнирдің басты мақсаты – отандық күрес спортының дамуына өлшеусіз үлес қосқан Мардан Баймұрзаұлы Сапарбаевтың есімін ұлықтап, өнегелі жолын кейінгі ұрпаққа насихаттау. Көрнекті бапкер, ғалым, педагогика ғылымдарының докторы әрі Сайрам ауданының Құрметті азаматы саналы ғұмырын спорт пен білім саласына арнады. 1982–1989 жылдары Шымкент дене тәрбиесі техникумын басқарса, 1989 жылдан бастап Шымкент педагогикалық дене тәрбиесі институтының ректоры қызметін атқарды. Ол республикаға танымал көптеген талантты шәкірт тәрбиелеп, ұлттық спорт мектебінің қалыптасуына зор үлес қосты. Бүгінде есімімен аталатын халықаралық турнир – ұлағатты ұстаз мұрасының жалғасып келе жатқандығының айқын көрінісі.
Салтанатты жиында спорт саласының ардагерлеріне ерекше құрмет көрсетілді. Ұзақ жылдар бойы спорттың дамуына еңбек сіңірген азаматтардың иығына шапан жабылып, олардың еңбегі ел алдында еленді. Сонымен қатар әлемдік додада жеңіспен оралған спортшыларға Марат Марданұлы арнайы сыйлықтарын табыстады. Мұндай құрмет – спорттың өркендеуіне үлес қосқан буынның еңбегіне көрсетілген жоғары бағасы. Халықаралық турнир жас балуандардың бәсекесін ғана емес, спорттағы сабақтастық пен ұрпақтар арасындағы тағылымды байланысты да айшықтайды.
