ӨНДІРІСТІҢ ЭКОЛОГИЯЛЫҚ ӘСЕРІ ЗЕРДЕЛЕНДІ

Өнеркәсіптік шығарындыларға бақылау күшейтілді. Шымкент қаласында экологиялық мәселелер жөніндегі жұмыс тобы «Оңтүстік» индустриялық аймағындағы «Polymettech» кәсіпорнына көшпелі отырыс ұйымдастырды. Бұған тұрғындардың өтініштері мен әлеуметтік желілердегі өндірістік шығарындыларға қатысты жарияланымдар негіз болған. Мамандар зауыттың қоршаған ортаға әсерін бағалап, өндірістік алаңдар мен қалдықтарды басқару жүйесін зерделеді.  Экология департаменті ағымдағы жылы кәсіпорындарға қатысты 36 тексеру жүргізген. Осы жылы Polymettech Полиметех кәсіп орнында олқылық шығып  64 миллион мың теңге көлемінде айыппұл салынған. Кәсіпорын анықталған заңбұзушылықтарды жойып, қоршаған ортаға келтірілген залалды өтеген. Түсті металдар мен арматура өндіретін, экологиялық әсер деңгейі бойынша бірінші санатқа жататын кәсіпорынның экологиялық талаптарды сақтауы жұмыс тобының басты назарында болды. Негізгі мақсат – өндіріс қарқыны мен қоршаған ортаны қорғау талаптарының үйлесімділігін қамтамасыз ету.

Кәсіпорынның 2026 жылға арналған атмосфераға шығарындыларының нормативтік көлемі жылына 21,2 тонна деп белгіленген. Жиын барысында жұмыс тобы өндірістік алаңдарды аралап, шығарындылар көздері мен газ тазарту жабдықтарының жұмысын қарады. Сонымен қатар қалдықтарды басқару жүйесімен танысты. Мамандар қоршаған ортаға әсерді азайтуға бағытталған шараларды зерделеді.

Жұмыс тобының мұндай мониторингі қаладағы өндіріс орындарының қоршаған ортаға әсерін бағалауға мүмкіндік береді. Экологиялық мәселелерді шешуде тұрғындардың өтініштері де назардан тыс қалмайды. Азаматтар шағымдары мен ұсыныстарын eOtinish порталы және 109 бірыңғай байланыс орталығы арқылы жолдай алады.