САНАНЫ УЛАЙТЫН СЕНІМГЕ ТОСҚАУЫЛ

Желідегі бір ғана кездейсоқ жазба адамды тағдыр тәлкегіне салуы мүмкін. Бүгінде ғаламтор жастар үшін жай ғана ақпарат алаңы емес, сананы улайтын жалған идеологиялардың тұзағына айналды. Осы бір өзекті мәселені арқау еткен «Жол» телесериалының шаһарда жабық көрсетілімі өтті. Ауқымды жоба Шымкент қаласының Дін істері басқармасының тапсырысымен түсіріліп 4 айдың ішінде жарыққа шыққан. Туындының бас аяғы қысқа уақытта әзірленсе де, көтерген жүгі ауыр. Негізгі мақсат — өскелең ұрпақты теріс діни ағымдардың арбауынан сақтандыру, ақпаратты саралап қабылдауға баулу және қоғамның діни сауатын арттыру.
Мамандардың дабылы негізсіз емес. «Бұл қауіпке бейжай қарау — қатерге бас тігумен тең»,— дейді олар. Себебі жат ағымның жетегінде кеткен әрбір жас — тек бір отбасының ғана емес, тұтас мемлекеттің қасіреті. Сондықтан мәселенің салдарымен күрескеннен гөрі, оның алдын алып, түсіндіру жұмыстарын заманауи тілде жеткізу аса маңызды.

Жастар ресурстық орталығянда өткен жабық көрсетілімді 650ге жуық студент тамашалады. 8 сериядан тұратын бұл фильм жастарға ресми ескертулерден гөрі, шынайы өмірлік оқиғалар арқылы ой салды. Картина әр көрерменнің көкейінегі дін жайлы, отбасы құндылықтары жайлы сұрақтарға күрделі сауалды тастады
Туындының көрерменге ұғындырар басты ақиқаты біреу — жалған ұранға ермей, дұрыс таңдау жасай білу. Өйткені адам өмірінің соқпағын мүлдем басқа бағытқа бұрып жіберетін — бір-ақ сәттік шешім. Ал ол шешімнің түзу болуы — ең алдымен ішкі сана мен сауаттылыққа байланысты.