Жас ұлғайса да, жігер мұқалмайды! Спортқа құштар қариялар бұл жолы сайыс алаңында бас қосты. Республика күніне орай Шаһарда ұйымдастырылған спартакиадада аға буын өкілдері спорттың 4түрінен өзара бақ сынап, салауатты өмір салтын ұстанудың жасқа қарамайтынын тағы бір мәрте дәлелдеді.Технология дамыған заманда телефонға телмірген жас буын үшін спортты серік еткен қариялардың өнегесі ерекше. Жарысқа қатысуышы аға буын өкілдеріне Сәрсен Құранбек сәттілік тілеп, салтанатты іс-шараны ашып берді.
Спартакиада Шымкент қаласының спорт басқармасы мен қалалық ардагерлер ұйымының қолдауымен өтті. Мұндай шаралар аға буын өкілдерінің спортқа деген қызығушылығын арттырып қана қоймай,олардың қоғамдағы белсенділігін дамытуға ықпал етпек. Бұл – Мемлекет басшысының халық арасында салауатты өмір салтын қалыптастыру және бұқаралық спортты дамыту жөніндегі тапсырмаларымен үндес бастама.Сайыстың басты ерекшелігі – қатысушылардың кәсіби спортшылар емес, қарапайым зейнеткерлер мен ардагерлер қатарынан іріктелуі. Аталғпн спорттық шараға қаланың бес ауданынан 60-қа жуық ардагер жиналған. Сайысқа қатысушы қарттар шахмат,бильярд, үстел теннисі және дойбыдан сынға түсіп, жеңіске деген жігері мен белсенділігін көрсетпек. Жарыс жеңімпаздарына ақшалай сый-сияпат үлестіріліп, арнайы мақтау қағаздары табысталады.Ардагерлер арасында ұйымдастырылған мұндай жарыстар салауатты өмір салтын насихаттап қана қоймай, өскелең ұрпаққа да үлгі болды. Өйткені спортқа деген құлшыныс пен жеңіске деген жігер жасқа қарамайды. Ең бастысы – қозғалыс, белсенділік және мықты денсаулық!
