Шымкентте қоршаған ортаны қорғау, қоғамдық орындардың тазалығын сақтау және жастардың экологиялық жауапкершілігін арттыру бағытындағы жұмыстар жалғасуда. «Таза Шым» қалалық акциясы аясында өткен кездесуде тазалық мәдениетін қалыптастыру, экологиялық заңнаманы сақтау және табиғатқа жанашырлықпен қарау мәселелері талқыланды.
Таза әрі жайлы қала қалыптастыру – тек коммуналдық қызметтердің жұмысына ғана емес, әрбір тұрғынның азаматтық ұстанымына байланысты. Көшеге тасталған қоқыс, ретсіз қалдырылған тұрмыстық қалдықтар мен қоғамдық орындарға деген немқұрайлы көзқарас қаланың көркіне ғана емес, қоршаған ортаның жағдайына да әсер етеді. Сондықтан экологиялық мәдениетті қалыптастыру және тазалықты ортақ құндылық ретінде орнықтыру қоғам алдындағы маңызды міндеттердің бірі болып отыр.
Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жалпыұлттық бастамасы да қоршаған ортаны қорғауға, елді мекендерді абаттандыруға және азаматтардың табиғатқа деген жауапкершілігін арттыруға бағытталған. Бұл ретте тазалықты бір реттік науқанмен шектемей, күнделікті өмір салтына айналдырудың маңызы зор.
Осы мақсатта Шымкент қалалық Жастар ресурстық орталығының бастамасымен «Заң мен тәртіп» қағидаты аясында «Таза Шым» акциясына арналған кездесу ұйымдастырылды. Жиынға мемлекеттік органдардың өкілдері, жастар ұйымдарының жетекшілері және 50-ге жуық жас қатысты.
Кездесуге Әл-Фараби ауданы прокуратурасының прокуроры Диана Оразымбетова, Экология департаменті басшысының орынбасары Дүйсен Құлтілеуов, «ASAA» жастар қоғамдық бірлестігінің президенті, Шымкент қаласындағы ACCESS бағдарламасының түлегі Данара Саранoва және Жастар ресурстық орталығы басшысының орынбасары Қуаныш Серікбай қатысты.
Жиын барысында қоршаған ортаны қорғау, экологиялық заңнама талаптарын сақтау, қоғамдық кеңістіктердің тазалығын қамтамасыз ету және жастардың азаматтық жауапкершілігін арттыру мәселелері кеңінен талқыланды. Қатысушылар экологиялық мәдениетті күнделікті өмірдің ажырамас бөлігіне айналдырудың жолдары жөнінде пікір алмасты.
«Заң мен тәртіп» қағидаты тұрғысынан алғанда, қоғамдық орындарды таза ұстау – әр азаматтың ортақ кеңістікке деген құрметін көрсететін маңызды әрекет. Қоқысты белгіленген орынға тастау, тұрмыстық қалдықтарды бейберекет қалдырмау, табиғи аумақтарды ластамау сияқты қарапайым ережелерді сақтау қоғамдағы жауапкершілік мәдениетін нығайтады.
Тазалықтың мәні тек көшелер мен аулалардың сыртқы көрінісін жақсартумен шектелмейді. Ол тұрғындардың қоғамдық тәртіпке көзқарасын, табиғатқа деген жанашырлығын және келешек ұрпақ алдындағы жауапкершілігін айқындайды.
Шымкентте жастарды экологиялық жобаларға тарту жұмыстары жүйелі түрде жүргізіліп келеді. Жастар ресурстық орталығы басшысының орынбасары Қуаныш Серікбайдың айтуынша, 2024 жылдан бері «Таза Қазақстан» республикалық бағдарламасы аясында жас буынның экологиялық белсенділігін арттыруға бағытталған көптеген іс-шара ұйымдастырылған.
Тек биылдың өзінде орталықтың бастамасымен 80-нен астам іс-шара өткізілген. Олардың нәтижесінде қатысушылар 33 тоннадан астам қоқыс жинап, арнайы орындарға шығарған. Ал тазалық жұмыстарына 22 мыңнан астам шымкенттік жас қатысқан. Олардың қатарында мектеп оқушылары, студенттер мен кәсіпорын қызметкерлері бар.
Бұл көрсеткіштер жастардың қоғамдық жұмыстарға белсенді араласып, туған қаласының тазалығына үлес қосып келе жатқанын аңғартады. Сонымен бірге мұндай бастамалар өскелең ұрпақтың бойында еңбекқорлықты, ұқыптылықты және ортақ іске жауапкершілікпен қарау дағдысын қалыптастыруға ықпал етеді.
Экологиялық акциялардың тәрбиелік мәні де ерекше. Өйткені тазалық жұмыстарына тікелей қатысқан жас қоршаған ортаны қорғаудың маңызын тереңірек түсініп, өзге адамдарға да үлгі бола алады. Мұндай тәжірибе экологиялық жауапкершіліктің сөз жүзінде емес, нақты іспен көрінуіне мүмкіндік береді.
Қоқысты жәшікке тастау, пластик бөтелкені қоғамдық орындарда қалдырмау, аула мен демалыс орындарын таза ұстау – қарапайым болғанымен, нәтижесі үлкен әрекеттер.
Егер әр тұрғын осы талаптарды күнделікті әдетке айналдырса, қоғамдық кеңістіктердің тазалығын сақтау да әлдеқайда жеңілдейді. Сондықтан экологиялық мәдениетті қалыптастыруда мемлекеттік органдармен қатар, білім беру ұйымдарының, қоғамдық бірлестіктердің, кәсіпорындардың және әрбір отбасының үлесі маңызды.
«Таза Шым» акциясы аясындағы кездесу де осы ортақ жауапкершілікті нығайтуға бағытталды. Мұндай шаралар жастардың экологиялық сауатын арттырып қана қоймай, оларды қаланың қоғамдық өміріне белсенді араласуға ынталандырады.
Таза Қазақстан құру – бір күндік сенбілікпен орындалатын міндет емес. Ол күн сайынғы тәртіптен, табиғатқа жанашырлықтан және әр азаматтың саналы таңдауынан басталады. Ал Шымкенттің таза, көрікті әрі жайлы қалаға айналуы – қала тұрғындары мен қоғамның бірлескен еңбегінің нәтижесі.
