Шымкентте ерекше қуанышты оқиға тіркелді. Бұған дейін екі рет егіз босанған көпбалалы ана бұл жолы үшемді дүниеге әкелді. Қос қыз бен бір ұлдың өмірге келуімен отбасындағы бала саны онға жетті. Дәрігерлердің кәсіби көмегінің арқасында мерзімінен бұрын туған сәбилердің жағдайы жақсарып, енді үйлеріне шығуға дайындалып жатыр.
Шымкент қалалық перинаталдық орталығында 17 қыркүйекте үшем дүниеге келді. Нәрестелер кесар тілігі арқылы өмірге келген. Олардың екеуі – қыз, біреуі – ұл. Ата-анасы сәбилерге Альсия, Сафия және Аймұхаммед есімдерін берген.
Туған кездегі салмақтары тиісінше 1740, 1482 және 1730 грамм болған нәрестелер мерзімінен бұрын дүниеге келгендіктен, алғашқы күндерінен бастап дәрігерлердің ерекше бақылауына алынды. Үшемдер әуелі жаңа туған нәрестелердің жансақтау бөлімінде ем қабылдап, кейін арнайы күтім бөліміне ауыстырылды.
Мамандар сәбилердің жағдайын тұрақты бақылап, олардың қалыпты дамуына қажетті медициналық көмекті көрсетті. Уақтылы жүргізілген ем-дом мен үздіксіз күтімнің нәтижесінде нәрестелердің жағдайы жақсарып, салмақтары біртіндеп арта бастады.
Қазіргі уақытта үшемнің жағдайы қанағаттанарлық. Салмақтары екі келіден асып, медициналық көрсеткіштерге сәйкес үйлеріне шығарылуға дайындалып жатыр. Бұл – сәбилердің өмірге бейімделу кезеңіндегі маңызды жетістіктің бірі.
Үшемдердің дүниеге келуі мен денсаулығын қалпына келтіру жолында Дәулет Сатов бастаған дәрігерлер командасы еңбек етті. Команда құрамында бөлім меңгерушісі Сандуғаш Нуранова, сондай-ақ Р. Мадусманов, Ақзат Шолпанқұлова, Перизат Шарипова, Камшат Әмірбекова және Айгүл Симағамбетова сынды мамандар болды.
Мерзімінен бұрын туған нәрестелерге күтім жасау жоғары кәсіби біліктілікті, мұқият бақылауды және дәрігерлердің үйлесімді жұмысын талап етеді. Осы орайда медициналық мамандардың еңбегі мен жауапкершілігі сәбилердің жағдайын жақсартуда маңызды рөл атқарды.
Отбасының қуанышын еселей түскен тағы бір жайт – үшемдердің анасы бұған дейін екі рет егіз босанған. Осылайша, шаңырақтағы бала саны онға жетті. Үй шаруасымен айналысатын ана мен жеке кәсіпкер әке үшін үш сәбидің өмірге келуі үлкен қуанышпен қатар, жауапкершілікті де еселей түсті.
Шымкент қалалық перинаталдық орталығында ана мен бала денсаулығын қорғау, жүктілік пен босану кезінде сапалы медициналық көмек көрсету бағытындағы жұмыстар жалғасуда. Ал үшемнің дүниеге келуі – бір отбасының ғана емес, сәбилердің амандығына тілекші болған барша жанның қуанышы.
Альсия, Сафия және Аймұхаммедтің дені сау болып өсіп, ата-анасының қуанышы мен бауырларының мақтанышына айналуына тілектеспіз!
