Қазақстан Республикасының Президенті Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» тақырыбында Қазақстан халқына жыл сайынғы Жолдауын жариялады. Мемлекет дамуының алдағы кезеңіне бағыт-бағдар беретін маңызды саяси құжатта экономиканы жаңғырту, халықтың әл-ауқатын арттыру, мемлекеттік басқару жүйесін жетілдіру және инфрақұрылымды кешенді дамыту мәселелері қамтылды.
Мемлекет басшысының Жолдауын Шымкент қаласының әкімдігі ұжым болып тікелей эфирден тамашалады. Президент көтерген бастамалар мен алға қойған міндеттер елдің әлеуметтік-экономикалық дамуы үшін маңызды екені атап өтілді.
Жолдауда Қазақстан Тәуелсіздігінің 35 жылдығы қарсаңындағы тарихи кезеңнің маңызына ерекше назар аударылды. Президент Мемлекеттік егемендік туралы декларацияның қабылдануы тәуелсіздікке қол жеткізу мен мемлекеттілікті нығайту жолындағы маңызды белес болғанын атап өтті. Сондай-ақ бүкілхалықтық қолдауға ие болған жаңа Конституцияның қабылдануы елдің саяси жүйесін жаңғыртуға және мемлекеттік басқарудың жаңа институттарын қалыптастыруға негіз болатынын айтты.
Мемлекет басшысы елдің келешек даму бағдарын айқындай отырып, экономикалық өсімді қамтамасыз ету, кәсіпкерлікті қолдау, инвестициялық ахуалды жақсарту және азаматтардың тұрмыс сапасын арттыру бағытындағы міндеттерді белгіледі.
Жолдауда экономиканың тұрақтылығын қамтамасыз ету, инфляцияны тежеу, салық жүйесін жетілдіру және шағын әрі микробизнестің дамуына қолайлы жағдай жасау мәселелері қозғалды. Сонымен қатар ең төменгі жалақыны арттыру және кәсіпкерлерге түсетін әкімшілік жүктемені азайту жөніндегі бастамаларға назар аударылды.
Бұл міндеттер еліміздің ірі экономикалық орталықтарының бірі саналатын Шымкент қаласы үшін де маңызды. Қала экономикасын әртараптандыру, өндірістік әлеуетті арттыру, кәсіпкерлік бастамаларды қолдау және жаңа жұмыс орындарын ашу – тұрақты дамудың негізгі тетіктері.
Мемлекет басшысы инвестиция тарту мен инвесторлардың құқықтарын қорғау мәселесіне де тоқталды. Осы бағытта Алатау қаласында инвестициялық сот құру ұсынылды. Мұндай бастамалар инвестициялық ахуалды жақсартуға, кәсіпкерлердің құқықтық қорғалуын күшейтуге және экономикалық белсенділікті ынталандыруға бағытталған.
Шымкент үшін инвестициялық жобаларды жүзеге асыру, өндіріс орындарын дамыту және отандық кәсіпкерлердің мүмкіндіктерін кеңейту қаланың экономикалық әлеуетін нығайтудың маңызды бағыттары болып қала береді.
2027 жыл – Жаппай құрылыс жылы
Президент Жолдауында инфрақұрылымды жаңғырту мәселесіне айрықша мән берілді. Мемлекет басшысы Үкіметке халық сұранысына ие әлеуметтік, көлік және инженерлік нысандарды салу мен жаңартудың ауқымды жоспарын әзірлеуді тапсырды. Осы мақсаттарға 2029 жылдың соңына дейін Ұлттық қордан шамамен 6,5 триллион теңге бағыттау жоспарланып отыр.
Сонымен қатар Қасым-Жомарт Тоқаев 2027 жылды Жаппай құрылыс жылы деп жариялады. Алдағы жылдан бастап еліміздің барлық өңірінде азаматтық инфрақұрылым нысандарын салу және жөндеу бойынша ауқымды жұмыстарды бастау көзделіп отыр.
«Жаңа тарихи кезеңге қадам баса отырып, біз бүкіл азаматтық инфрақұрылымды салуға және жаңартуға кірісеміз. Алдағы бірнеше жылда құрылыс қарқыны барлық өңірді қамтиды», – деді Мемлекет басшысы.
Президенттің айтуынша, алдағы жылдары автомобиль жолдары, өнеркәсіптік және энергетикалық нысандар, теміржолдар, көпірлер, инженерлік желілер, гидротехникалық құрылыстар, мектептер, ауруханалар, спорт кешендері мен мәдениет нысандары салынып, жаңартылады.
Бұл міндеттер Шымкенттің қала құрылысы мен инфрақұрылымын дамыту үшін де өзекті. Халық санының өсуі, жаңа тұрғын алаптардың қалыптасуы және қаланың экономикалық белсенділігінің артуы инженерлік желілерді жаңартуды, көлік қатынасын жақсартуды және әлеуметтік нысандардың қолжетімділігін қамтамасыз етуді талап етеді.
Осы тұрғыдан алғанда, Жаппай құрылыс жылы аясында белгіленетін міндеттер қаланың инфрақұрылымдық әлеуетін күшейтуге, тұрғындарға қолайлы орта қалыптастыруға және урбанистикалық дамудың сапасын арттыруға жаңа мүмкіндіктер береді.
Мемлекеттік басқару мен әлеуметтік даму – ортақ міндет
Жолдауда мемлекеттік басқару жүйесін жетілдіру және жаңа Азаматтық кодексті әзірлеу қажеттігі де айтылды. Бұл бағыттағы бастамалар мемлекеттік институттардың тиімділігін арттыруға, құқықтық тетіктерді жетілдіруге және қоғам мен мемлекет арасындағы өзара байланысты нығайтуға бағытталған.
Президент көтерген мәселелердің қатарында азаматтардың әл-ауқатын арттыру, әлеуметтік инфрақұрылымды дамыту және өскелең ұрпақ үшін қолайлы жағдай қалыптастыру міндеттері де бар. Мектептер мен ауруханаларды жаңарту, спорт және мәдениет нысандарын салу халықтың өмір сапасына тікелей әсер етеді.
Шымкент қаласы үшін де әлеуметтік нысандардың қолжетімділігі мен сапасын арттыру, тұрғындардың күнделікті сұранысына жауап беретін инфрақұрылым қалыптастыру маңызды. Бұл ретте әрбір жобаның нақты қажеттілікке сай жүзеге асуы, бюджет қаражатының тиімді жұмсалуы және орындалатын жұмыстардың сапасы басты назарда болуы тиіс.
Мемлекет басшысы инфрақұрылымдық жаңғыртудың жаңа өндіріс орындарын ашумен және цифрлық экономиканы дамытумен тығыз байланысты екенін атап өтті. Демек, құрылыс жұмыстары тек нысандар санын көбейтумен шектелмей, жаңа экономикалық мүмкіндіктерге жол ашуы, жұмыспен қамтуды арттыруы және өңірлердің бәсекеге қабілеттілігін күшейтуі қажет.
Жолдауда белгіленген міндеттерді сапалы орындау жергілікті атқарушы органдардың жүйелі жұмысына тікелей байланысты. Осыған орай, Жолдаумен танысу қорытындысы бойынша Шымкент қаласының әкімі Ғабит Сыздықбеков жауапты басшыларға Мемлекет басшысы айқындаған басым бағыттарды іске асыруды қамтамасыз етуді және тиісті шаралар қабылдауды тапсырды.
Президент Жолдауы – елдің алдағы даму кезеңіне арналған маңызды бағдар. Онда белгіленген міндеттерді жүйелі жүзеге асыру Шымкенттің экономикалық әлеуетін нығайтуға, инфрақұрылымын жаңғыртуға, инвестициялық тартымдылығын арттыруға және қала тұрғындарының өмір сүру сапасын жақсартуға негіз болады.
