Қала әкімінің аппараттық кеңесінде тұрғындар өтініштері, ауыр жүк көліктерінің қозғалысы және ветеринариялық-санитариялық қауіпсіздік мәселелері талқыланды
Қаланың тұрақты дамуы ең алдымен тұрғындардың күнделікті өміріне тікелей әсер ететін мәселелердің қаншалықты жедел шешілетінімен өлшенеді. Жолдың жағдайы, инженерлік инфрақұрылым, қоғамдық көлік, абаттандыру, жер және тұрғын үй мәселелері – халықтың билікке жиі қоятын сауалдарының қатарында. Осы бағыттағы жұмыстар Шымкент қаласының әкімдігінде тұрақты бақылауда. Қала әкімі Ғабит Сыздықбековтің төрағалығымен өткен аппараттық кеңесте тұрғындармен көшпелі кездесулердің қорытындысы шығарылып, көліктік бақылау, ауыр жүк көліктерінің қозғалысын автоматтандыру және ветеринариялық-санитариялық қауіпсіздікті қамтамасыз ету мәселелері қаралды.
Биылғы үшінші тоқсанда Шымкентте тұрғындармен 20 көшпелі кездесу ұйымдастырылды. Оларға шамамен 2 мың азамат қатысып, 898 өтініш пен ұсыныс білдірген. Кездесулер барысында көтерілген мәселелердің басым бөлігі инженерлік және жол-көлік инфрақұрылымына қатысты. Сонымен қатар жер және тұрғын үй, абаттандыру, қоғамдық көлік, балалар ойын алаңдары, кәріз жүйесі, жер учаскелерін заңдастыру және тұрғын үй кезегіне тұру мәселелері де тұрғындардың назарында болған. Бұл көрсеткіштер халықпен тікелей кездесудің маңызын аңғартады. Себебі көшпелі қабылдаулар кезінде тұрғындар мәселені тек жеткізіп қана қоймай, оның шешілу барысын жауапты мамандармен бірге талқылауға мүмкіндік алады. Жалпы, 2023–2026 жылдар аралығында қалада 227 көшпелі кездесу өткізіліп, 5,6 мың өтініш түскен. Оның 4 315-і немесе 77,1 пайызы орындалған. Қалған 1 285 өтініш бойынша тиісті жұмыстар жүргізілуде.
Бұл ретте әр өтініштің артында нақты адамның мәселесі тұрғанын ескеру маңызды. Сондықтан тұрғындармен жұмыстың нәтижелілігі тек қабылданған өтініштер санымен емес, олардың қаншалықты нақты әрі сапалы шешілгенімен бағаланады. Аппараттық кеңесте қаладағы көлік қозғалысының қауіпсіздігіне қатысты мәселелер де кеңінен талқыланды. Бүгінде Шымкентте 560 мыңнан астам автокөлік тіркелген. Оның 40 915-і – жүк көлігі. Көлік санының артуы жол инфрақұрылымына түсетін салмақты көбейтіп қана қоймай, ауыр жүк көліктерінің қозғалысын жүйелі бақылауды қажет етеді. Жыл басынан бері Көліктік бақылау инспекциясы 7,1 мың жүк көлігін тексерген. Нәтижесінде 2 871 әкімшілік хаттама толтырылып, 300,5 млн теңге көлемінде айыппұл салынған.
Әсіресе ауыр жүк көліктерінің белгіленген талаптарды сақтауын бақылауда цифрлық технологиялардың рөлі артып келеді. Қала аумағында ауыр жүк көліктерін бақылауға арналған үш автоматтандырылған өлшеу станциясы жұмыс істейді. Осы станциялар арқылы 1,8 мыңнан астам заң бұзушылық анықталып, 1 245 нұсқама берілген. Салынған айыппұл көлемі 207 млн теңгені құрады. Жыл соңына дейін тағы алты автоматтандырылған өлшеу станциясын іске қосу жоспарланып отыр. Бұл жүйе ауыр жүк көліктерінің қозғалысын бақылауды күшейтіп, белгіленген талаптардың сақталуын қамтамасыз етуге мүмкіндік береді. Сонымен қатар адам факторын азайтып, бақылаудың ашықтығын арттыруға бағытталған.
Қаладағы 14 карьерлік кәсіпорын бойынша жүргізілген рейдтер мен тексерулер барысында 613 жүк көлігі тексеріліп, 411 әкімшілік хаттама толтырылған. Нәтижесінде 30,7 млн теңге көлемінде айыппұл салынды. Алдағы кезеңде автоматтандырылған бақылау станцияларының желісін кеңейтіп, карьерлерге салмақ өлшейтін арнайы жабдықтар орнату көзделіп отыр. Мұндай шаралар ауыр көліктердің белгіленген талаптарды сақтауын бақылауға және жол инфрақұрылымына түсетін шамадан тыс салмақтың алдын алуға бағытталған. Бұл ретте бақылаудың мақсаты тек құқық бұзушылықты анықтап, айыппұл салумен шектелмеуі тиіс. Негізгі міндет – жол қауіпсіздігін қамтамасыз ету, көлік тәртібін қалыптастыру және инфрақұрылымның сақталуына жағдай жасау. Мамандардың мәліметінше, қаладағы эпизоотиялық жағдай тұрақты. Жылдың сегіз айында 2 117 мемлекеттік қызмет көрсетіліп, жоспарлы және жоспардан тыс тексерулер қорытындысы бойынша 210 әкімшілік хаттама толтырылған. Заң бұзушылықтарға байланысты 9,4 млн теңге көлемінде айыппұл салынған. Бұл бағыттағы бақылаудың маңызы жоғары. Себебі ветеринариялық-санитариялық талаптардың сақталуы тек мал шаруашылығына ғана емес, халықтың тұтынатын азық-түлік өнімдерінің қауіпсіздігіне де тікелей қатысты. Ішкі сауда нысандарын тексеру барысында талапқа сай құжаттары жоқ немесе белгіленген тәртіпті бұза отырып әкелінген 12 510 тауық жұмыртқасы және ветеринариялық құжаттары жоқ 15,7 келі шұжық өнімі анықталып, жойылды. Бұл фактілер бойынша 324 мың теңге көлемінде айыппұл салынды.
Сонымен қатар малды белгіленбеген орындарда союға қатысты 14 әкімшілік хаттама толтырылып, 692 мың теңге айыппұл өндірілді. Мұндай бақылау жұмыстарының түпкі мақсаты – кәсіпкерге айыппұл салу емес, санитариялық талаптардың сақталуын қамтамасыз ету және тұтынушы қауіпсіздігін қорғау.
Шымкентте қаралған мәселелердің барлығы «Заң мен тәртіп» қағидатымен тікелей сабақтас. Тұрғын өтінішіне жауап беру, жол қозғалысы талаптарын сақтау, ауыр көліктердің белгіленген нормадан артық жүкпен жүруіне жол бермеу, азық-түлік қауіпсіздігін қамтамасыз ету – мұның бәрі қаладағы қоғамдық тәртіп пен азаматтардың қауіпсіздігіне қатысты. Мемлекет басшысы Қасым-Жомарт Тоқаев қоғамда заң мен тәртіпті қамтамасыз етудің маңызын бірнеше рет атап өтті. Бұл ретте заң талаптарын сақтау тек мемлекеттік органдардың міндеті емес, қоғамның әр мүшесіне ортақ жауапкершілік. Осы қағидат тұрғысынан алғанда, профилактика мен цифрлық бақылау тетіктерін күшейту маңызды. Құқық бұзушылық орын алғаннан кейін шара қолданумен қатар, оның алдын алуға басымдық беру – тиімді басқарудың негізгі бағыттарының бірі.
Аппараттық кеңес қорытындысында қала әкімі тұрғындардың өтініштерімен жұмысты күшейтуді тапсырды. Сонымен қатар ауыр жүк көліктері мен карьерлік кәсіпорындардың қызметіне бақылауды кеңейту, ветеринариялық бақылауды күшейту бойынша қосымша шаралар қабылдау жөнінде міндеттер жүктелді.
Бұл тапсырмалардың барлығы бір мақсатқа – тұрғындарға қауіпсіз әрі қолайлы орта қалыптастыруға бағытталған. Шымкент халқының саны мен қала аумағы ұлғайған сайын басқару жүйесіне қойылатын талап та арта береді. Сондықтан тұрғындармен кері байланысты күшейту, заманауи бақылау технологияларын енгізу, заң талаптарының сақталуын қамтамасыз ету және санитариялық қауіпсіздікке басымдық беру – қаланың тұрақты дамуының маңызды шарттары. Тұрғынның мәселесін тыңдау – жұмыстың бастауы. Ал оны нақты шешу – мемлекеттік басқарудың басты нәтижесі. Сондықтан Шымкентте көтерілген әр мәселенің соңына дейін жеткізілуі қала тұрғындарының билікке деген сенімін нығайтатын негізгі көрсеткіштердің бірі болмақ.
