Шымкентте «Таза Қазақстан» республикалық экологиялық бастамасы аясында жалпы қалалық сенбілік ұйымдастырылды. Бұл шараның басты ерекшелігі тазалау жұмыстарымен шектелмей саябақтың табиғи ортасын байыта отырып, 10 тиын, 25 қырғауылды бақ ішіне, ал 250 кл балықты көлге жіберіп, аумаққа ерекше көңіл бөлді Тазалық шарасының негізгі алаңдарының бірі – Асанбай Асқаров атындағы Шымкент мемлекеттік дендрологиялық саябағы. Дүниежүзілік және республикалық акцияны ұштастырған тұрғындар, жастар, еріктілер мен коммуналдық сала қызметкерлері саябақ аумағында санитарлық тазалау жұмыстарын жүргізді.
Экологиялық игі шараға қала әкімі мен 43 мыңнан астам тұрғын қатысты. Ғабит Сыздықбеков жұртшылықпен бірге тазалық акциясына үлес қосып, саябақ ішіне қырғауылдарды, ал көлге балықтарды жіберді. Бұл жасалған іс Денросаябақтың табиғи ортасын байытуда үлкен үлес қосады. Сонымен қатар мамандар акция аясындағы экологиялық жұмыстар мен «Таза Қазақстан» бастамасын қолдауға бағытталған іс-шаралар алдағы уақытта да жүйелі түрде жалғасатынын жеткізді. Сенбілік барысында қаланың тазалық жұмыстарына 200-ден астам арнайы техника жұмылдырылып, саябақ аумағында қоқыстар жиналды. Сонымен қатар ирригациялық арықтар тазартылып, ағаштарға санитарлық қырқу жұмыстары да жүргізілген.
Нәтижесінде қала аумағынан 270 тоннадан астам тұрмыстық және өзге де қалдық шығарылды. Таза қала – баршамызға ортақ жауапкершілік. Қоршаған ортаны қорғау жолындағы әрбір игі іс маңызды. Қала аумағында экологиялық ахуалды жақсартуға бағытталған мұндай шаралар тұрғындарды бір мақсатқа жұмылдырып, табиғи байлықтарды көздің қарашығындай сақтаудың маңызын тағы бір рет айқындады.
