Шымкент қаласының медицина қызметкерлері кәсіби саладағы жетістіктерімен қатар, спорттағы шеберлігін де танытып, республикалық деңгейдегі додада топ жарды. Қостанай қаласында медицина қызметкерлері арасында өткен «Спорт нашақорлыққа қарсы» атты республикалық спартакиадада шымкенттік команда жалпыкомандалық есепте І орын иеленді.
Елдің 20 өңірінен келген медицина саласының мамандары бас қосқан жарыста қатысушылар спорттың бірнеше түрінен бақ сынап, өзара мықтыны анықтады. Ақ халатты жандар үшін бұл дода дене дайындығын сынайтын жарыс қана емес, әріптестік байланысты нығайтып, салауатты өмір салтын насихаттайтын маңызды алаңға айналды.
Спартакиаданың негізгі мақсаты – медицина қызметкерлері арасында салауатты өмір салтын қалыптастыру, бұқаралық спортты дамыту және спорт арқылы зиянды әдеттердің алдын алуға ықпал ету. Осы ретте жарысқа қатысушылар спорттық шеберлікпен қатар, ұйымшылдық пен командалық рухтың да маңызын көрсетті.
Шымкент қаласының намысын қорғаған медицина қызметкерлері бірнеше спорт түрінен жүлделі орындарға ие болып, жалпы есепте 5 алтын, 2 күміс және 1 қола медаль еншіледі.
Атап айтқанда, шымкенттіктер үстел теннисінен үздік атанып, алтын медальға қол жеткізді. Тоғызқұмалақтан да командалық есепте қарсыластарынан басым түсіп, жеңіс тұғырының ең биік сатысына көтерілді. Ал қыздар арасындағы баскетболдың 3×3 форматында Шымкент командасы чемпион атанды.
Ерлер арасындағы баскетболдың 3×3 форматында қала командасы ІІ орын иеленіп, күміс жүлдені қанжығалады. Ал волейболдан сынға түскен медицина қызметкерлері ІІІ орыннан көрінді.
Жалпыкомандалық есептегі бұл нәтиже шымкенттік медицина мамандарының спортқа деген қызығушылығы жоғары екенін және ұжымдық бірліктің берік қалыптасқанын көрсетті. Күнделікті жұмысында адам денсаулығы мен өміріне жауап беретін медицина қызметкерлерінің өздері де белсенді өмір салтын ұстанып, оны қоғам арасында насихаттауының мәні зор.
Өйткені салауатты өмір салты – аурудың алдын алудың маңызды факторларының бірі. Ал денсаулық сақтау саласының мамандары бұл бағытта халыққа кеңес беріп қана қоймай, өз өмір салты арқылы да үлгі бола алады. Осы тұрғыдан алғанда, медицина қызметкерлерінің бұқаралық спортқа белсенді қатысуы кәсіби міндеттерімен үндесіп жатыр.
Спартакиада барысында еліміздің әр өңірінен келген мамандар өзара тәжірибе алмасып, әріптестік байланыстарын нығайтты. Мұндай жарыстар медицина қызметкерлерінің дене белсенділігін арттырып қана қоймай, ұжымдық рухты күшейтіп, әріптестер арасындағы өзара қолдау мен ынтымақтастықты қалыптастыруға мүмкіндік береді.
Шымкенттік медицина қызметкерлерінің республикалық спартакиададағы жеңісі – жүйелі дайындықтың, табандылықтың және ауызбіршіліктің нәтижесі. Олар ақ халатты маман ретінде адам денсаулығын қорғаудағы жауапкершілігін абыроймен атқарып қана қоймай, спорт алаңында да қала намысын лайықты қорғады.
Салауатты ұлт қалыптастыру жолында денсаулық сақтау саласының мамандарының өнегесі ерекше. Спорттағы бұл жеңіс – Шымкент медицина қызметкерлерінің кәсіби білімі мен азаматтық белсенділігіне қоса, бірлік пен сергек өмір салтын серік еткенін көрсететін жарқын жетістік.
