Өндірістің талабы өзгерген сайын, маман даярлау тәсілі де жаңаруы тиіс. Осыған байланысты Шымкенттегі колледждер биылғы оқу жылын жаңа міндеттермен бастамақ. Ең алдымен, студенттердің білім алу сапасын арттырып, кәсіби маман атануына жағдай жасау көзделіп отыр. Бұл бағыттағы жұмыстар техникалық және кәсіптік білім беру педагогтерінің тамыз конференциясында талқыланды.
Бүгінде еңбек нарығында дипломы бар маманнан бөлек, өз кәсібін жетік меңгерген, алған білімін тәжірибеде қолдана алатын кадрға сұраныс жоғары. Сондықтан колледждерде студенттердің теориялық білімін тәжірибемен ұштастыруға көңіл бөлінбек. Өндірістегі жаңа технологиялар мен заманауи құралдарды меңгеру де болашақ маман үшін маңызды.
Жиында студенттердің кәсіби дағдыларын дамытуға бағытталған жаңа тәсілдер де таныстырылды. Цифрлық технологияларды пайдалану, жасанды интеллект мүмкіндіктерін оқу үдерісіне енгізу және тәжірибелік сабақтарды күшейту мәселелері сөз болды. Мұның барлығы жастардың таңдаған мамандығын жақсы меңгеріп, еңбек нарығына дайын болып шығуына мүмкіндік береді.
