Қазақтың қолөнері – ғасырлардан жеткен асыл мұра. Бүгінде сол мұраны дәріптеп қана қоймай, оны кейінгі ұрпаққа үйретіп жүрген шеберлер аз емес. Шымкент Креатив хаб орталығында өткен шеберлік сабағы соның бір дәлелі. Іс-шара барысында сырмақ жасау өнері таныстырылып, қатысушылар ұлттық қолөнердің қыр-сырымен жақынырақ танысты.
Шеберлік сағатында қатысушылар сырмақтың жасалу жолын тәжірибе жүзінде көріп, ұлттық ою-өрнектің мән-мағынасына қанықты. Қолөнер шебері Гүлнәр Жолдасбекованың айтуынша, бұл өнер оған анасынан дарыған. Бүгінде ол осы киелі кәсіпті жалғастырып, 32 жылдан бері шәкірт тәрбиелеп келеді.
Сырмақ – қазақ халқының тұрмыс-тіршілігімен біте қайнасқан асыл мұра. Табиғи жүннен дайындалатын бұйымның тұрмысқа қолайлылығы ғана емес, денсаулыққа да пайдасы зор. Осындай шеберлік сабақтары арқылы жас буын ата кәсіптің қыр-сырын меңгеріп, ұлттық өнерге деген қызығушылығын арттыруда.
