ЖЫЛ СОҢЫНА ДЕЙІН 4668 БАСПАНА

Шымкентте тағы 30 отбасы баспаналы болып, көптен күткен қуанышқа кенелді. Қала әкімі қатысқан салтанатты рәсімде жаңа пәтердің кілті табысталып, тұрғындардың қуанышы еселенді. Биыл тұрғын үймен қамту жұмыстары қарқын алып, мыңдаған отбасы баспаналы болуда. Жыл соңына дейін тағы 4 668 пәтер пайдалануға беріліп, тұрғын үй кезегінде тұрған мыңдаған азаматтың арманы орындалады.

Шымкентте тұрғындарды баспанамен қамту жұмыстары жүйелі түрде жалғасып келеді. Қала әкімі  Ғабит Сыздықбеков қатысқан салтанатты рәсімде 30 отбасыға жаңа пәтердің кілті табысталды. Жалпы 2026 жылдың соңына дейін тұрғын үй кезегінде тұрған 7 386 азаматты баспанамен қамту жоспарланған. Оның ішінде 2 818-і жалдамалы, ал 4 568-і несиелік бағыттағы пәтерлер. Бұл бастама тұрғындардың өмір сүру сапасын жақсартуға бағытталған.

Жаңа қонысқа ие болған тұрғындардың қуанышында шек жоқ. Көпбалалы ұлы мен келінінің баспаналы болғанына қуанған тұрғын Нават Исаева бұл күнді ұзақ күткендерін айтып, ризашылығын білдірді. Ол елде әрдайым тыныштық пен береке болып, әр шаңыраққа осындай қуаныш бұйырсын деген ақ тілегін жеткізді. Жаңа пәтерге қол жеткізген отбасылар үшін бұл күн – жаңа өмірдің жарқын бастауы.

Жыл басынан үшінші мегаполисте 2 718 пәтердің кілті табысталды. Оның ішінде 1 710 отбасы несиелік баспана  болса, 1 008 отбасы жалдамалы пәтермен қамтылған. Шымкентте баспанамен қамту жұмыстары қарқынын бәсеңдеткен емес. Апта сайын жаңа пәтерлер пайдалануға беріліп, тұрғындарға салтанатты түрде табысталуда. Нәтижесінде мыңдаған отбасының тұрғын үй мәселесін кезең-кезеңімен шешу жоспарланып отыр.