30 ОТБАСЫ БАСПАНАЛЫ БОЛДЫ

Шымкентте тұрғындарды қолжетімді баспанамен қамту бағытындағы игі істер жалғасуда. Кезекті 30 отбасы жаңа пәтердің кілтін алды. Ақжайық шағынауданында бой көтерген заманауи үйлерден беріліп жатқан баспаналар мемлекеттік бағдарламалар мен жеңілдетілген ипотека аясында ұсынылды. Бұл бастама – қала тұрғындарының тұрмыс сапасын арттыруға бағытталған нақты қадам.

Шымкентте тағы да бір қуанышты сәт – 30 отбасы жаңа баспанаға қол жеткізді. Қоныс тойын Ақжайық шағынауданының тұрғындары тойлайды. Жаңа пәтерлер барлық талапқа сай салынып, қажетті инфрақұрылыммен толық қамтамасыз етілген. Бағдарлама аясында әлеуметтік осал топтағы азаматтарға басымдық берілді. Бұл – халықтың әл-ауқатын арттыруға бағытталған жүйелі жұмыстардың нәтижесі.

Пәтерлер мемлекеттік тұрғын үй бағдарламалары және Отбасы банкі арқылы ұсынылды. Жеңілдетілген ипотека тетіктері азаматтарға үлкен мүмкіндік беріп отыр. «2-10-20» және «5-10-20» бағдарламаларына қатысушылар төлем қабілеттілігін растаған. Олардың қатарында көпбалалы және толық емес отбасылар бар. Сондай-ақ ерекше балаларды тәрбиелеп отырған ата-аналар мен бюджет саласының қызметкерлері де қамтылған.

Бүгінде пайдалануға берілген тұрғын үйлердің сапасы жоғары деңгейде бағаланып, тұрғындар қала басшылығына шынайы алғыстарын білдіруде. Олар бұл игілікті істер ел экономикасының өсіп, халықтың әл-ауқатының артып келе жатқанын көрсетеді дейді. Осындай қуанышты сәтте немере келінін қолдап келген Мейрам Асанханқызы көпшілікті қаланы қорғап, тазалықты сақтауға шақырды.

Жаңа тұрғын үйлер сапалы әрі заманауи талаптарға сай салынған. Инженерлік жүйелер толық жүргізіліп, тұрғындарға қолайлы жағдай жасалған. Мұндай жобалар қаладағы тұрғын үй қорын ұлғайтуға мүмкіндік береді. Сонымен қатар, халықтың өмір сүру деңгейін арттыруға ықпал етеді. Алдағы уақытта да осындай игі бастамалар жалғасын табады.