Үшінші мегаполисте медициналық дәрі-дәрмектерге жұмсалатын бюджет үнемделмек. Оған себеп, қаламызда балалар клиникалық ауруханасының базасында «Госпитальдық фармаци»” бөлімшесі ашылды. Денсаулық сақтау министрлігінің хабарлауынша, бөлімшені ашудағы басты мақсат – пациенттерге препараттарды жеткізу жүйесін цифрландыру, дәрілік заттардың дербестендірілген есебін жүргізу.
Фармацевтикалық қызметті жақсарту, стационарда дәрілік заттарды тиімді пайдалану үшін қаламызда «Госпитальдық фармация» бөлімшесі ашылды. Аталмыш бөлімше медициналық жабдықтармен, ламинарлық шкафтармен, ротациялық орау машинасымен жабдықталған.
«Мұнда берілетін дәрі-дәрмектердің саны автоматты түрде бақыланады. Бұл бөлімшенің бірегейлілігі — медициналық дәрі-дәрмектерге жұмсалатын шығыстарды үнемдеу. Алдын ала есептеулер бойынша жоба бюджетті үнемдеуге мүмкіндік береді», — деп атап өтті Шымкент қалалық 2 аурухананың бас дәрігері.
Бұл жоба бүкіл әлемде қолданылады және халықаралық талаптардың біріне жатады. 2024 жылдың соңына дейін шаһарымыздағы 5 медициналық ұйымда госпитальдық фармация бөлімшесін ашу жоспарланып отыр. Нәтижесінде дәрілік заттарды ұтымды пайдалану есебінен бюджет қаражатын 20% ға дейін үнемдеу күтілуде. Жобаның негізгі міндеті — дәрігерлердің тағайындауы бойынша дәрілік заттарды уақтылы және сапалы дайындау, сондай-ақ оларды пневматикалық пошта арқылы медициналық ұйымның клиникалық және пара-клиникалық бөлімшелеріне жеткізу. Клиникалық фармаколог әр пациентке жеке параметрлері бойынша дәрі тағайындайды.
Еске сала кетейік, бұндай бөлімше елімізде ең алғаш Астана қаласында ашылған еді. Ол кезде жоба жылына 400 млн теңгеге дейін бюджетті үнемдеуге мүмкіндік береді делінген.
