Елордада өтетін V-ші дүниежүзілік көшпенділер ойындарының басталуына 46 күн қалды. Халықаралық байрақты бәсекеде 90-ға жуық елден 2000-нан астам қатысушы бақ сынайды. Әлемнің назарын аударған көшпенділер ойындарын әділ әрі тәжірибелі түрде өткізу мақсатында мегаполисте көкпар спортынан төрешілік білімін меңгеру бойынша халықаралық тренинг өтті. Оған Қазақстаннан және шет елдерден келген 35 төреші қатысты.
Ағымдағы жылы Астана қаласында өтетін V-ші дүниежүзілік көшпенділер ойындары — этникалық спорт түрлерінен өткізілетін халықаралық жарыс. Бұл Қазақ елі үшін маңызды қоғамдық саяси және стратегиялық жоба. Мемлекет басшысы Қазақстан халқына жолдауында көшпенділер ойындарының маңызын атап өткен болатын. Халықаралық дәрежеде, сондай-ақ, әділ әрі тәжірибелі өткізу мақсатында байрақты бәсекеге бекітілген көкпар спортының төрешілері мегаполисте бас қосты. Оған: Қазақстан, Қырғызстан, Өзбекстан, Моңғолия, Тәжікстан, Ресей, Түркия, Мажарстан, Грузия, Пәкістан мемлекеттерінен келген 35 төреші қатысты.
Жарыс орталық Азияның тарихи көшпелі халықтарының ұлттық ойындарына негізделген. ДКО адамзат өркениетінің мұрасы ретінде этноспорттық және этномәдени қозғалысты дамытуға бағытталады. Бәсеке 8-13 қыркүйек аралығында Астана қаласында спорттың 21 түрінен өтеді.
Төрешілер бас қосқан жиында көкпар спортының ережелері мен түрлері егжей-тегжейлі түсіндірілді.
Ат үстіндегі алыптар көкпардың 2 түрі бойынша тартысқа түседі. Бірі көшпенді кезеңнен қалыптасқан шеңберлі жүйе, ал, екінші түрі қазандық.
Айта кетейік, 90-ға жуық елден қатысатын V-ші Дүниежүзілік көшпенділер ойындарында 97 медаль сарапқа салынады.
